Greenland Minerals A/S-ip Namminersorlutik Oqartussat eqqartuussivilersuuppai. Aatsitassarfik Kuannersuarni piiaanissamut akuersissummik tunineqarnissamut qinnuteqaammut naalakkersuisunit itigartinneqarsimanini pissutigalugu eqqartuussivilersuussivoq.

Greenland Minerals nunatta kujataani Kuannersuarni aatsitassarsiornissamut periarfissanik misissuinissamut Danmarkimit nunatsinniillu 2007-imi akuersissuteqarfigineqarpoq.

Tamannali Inatsisartuni amerlanerussuteqartut Kuannersuarni aatsitassarsiorfimmi nutaami aatsitassanik qaqutigoortunik piiaasoqarnissaanut pilersaarutinik taamaatitsineratigut unitsinneqarpoq. Naalagaaffiup eqqartuussissuserisuata tamanna naalagaaffiup karsianut milliardilinnik naleqarsinnaasoq nalilernikuuaa.

Naalakkersuisut Greenland Mineralsip qinnuteqaataanut 2023-mi juunip aallaqqaataani itigartitsipput. Tamannami uranimut inatsimmut unioqqutitsimmat.

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik tusagassiiutinut nalunaarummi allappoq.

Ataqqinninngitsoq

Naalakkersuisut eqqartuussivilersuussisoqarnera tupaallaatiginngilaat.

- Eqqartuussisulersuussinissaq naatsorsuutigineqaraluartoq, Greenland Minerals A/S-ip uranimut inatsit taassumalu atuuffissai ataqqinngimmagit soorunami uggornartorujussuuvoq. Naalakkersuisut naatsorsuutigineqartutut, aammalu pisussaaffigisatsitut, inatsit malippaat, aatsitassanut naalakkersuisoq, Naaja H. Nathanielsen tusagassiuutinut nalunaarummi oqarpoq.

Greenland Mineralsip Namminersorlutik Oqartussanik eqqartuussivilersuussinermi saniatigut naalakkersuisut, siulittaasup naalakkersuisoqarfia, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik, Nunalerinermut, Imminut Pilersornermut, Nukissiutinut, Avatangiisinullu Naalakkersuisoqarfik, Aatsitassanut Ikummatissanullu Aqutsisoqarfik aamma Aatsitassanut Suliassaqarfinnut Avatangiisinut Aqutsisoqarfik eqqartuussivilersuuppai.

Tamatuma saniatigut Inatsisartut kiisalu Silap Pissusianut, Nukissiuuteqarnermullu Ministereqarfik eqqartuussivilersuunneqarput.

Naalakkersuisut aalajangigaat pissutigalugu danskit ministereqarfiat aamma Inatsisartut ilanngullugit eqqartuussivilersuunneqarnerat Naaja H. Nathanielsenip uggoraa.

- Tamatumani siunertatuaasoq tassaavoq eqqissiviilliortitsinissaq aammalu sullissiviit suliamut attuumassuteqanngitsut aningaasaqarnikkut allaffissornikkullu nammakkersornissaat. Tamanna peqqusersuneruvoq aammalu ingerlatseqatigiiffik suunersoq aamma nunamut aatsitassarsiorfimmut akuersissummik kissaateqarfigisaminnut qanoq ataqqinninngitsiginersoq takussutissaalluni, taanna oqarpoq.