Ataatsimiititaliartaaq nunanut allanut tunngasunut naalagaaffeqatigiinnermi suleqatigiilersitsissasoq

Nunanut allanut politikkimut tunngatillugu Kalaallit Nunaat Savalimmiullu peqataanerusariaqarput. 

Naalagaaffeqatigiit iluanni naalakkersuisut Múte B. Egede aamma savalimmiup, Bárður á Steig Nielsen, peqataaffigisaanni junimi ataatsimiittoqarmat statsministeri Mette Frederiksen taama oqarpoq. 

- Danmarki issittumi naalagaaffiunngilaq, Frederiksen taamani oqarpoq.

Kalaallit Nunaat Savalimmiullu Issittumi Siunnersuisooqatigiinni oqartussaassuseqarnerulernissaat aasaq ataastimiinnermi isumaqatigiissutigineqarpoq. Tamannali kisimi nutaarsiassatut saqqumminngilaq.

Tassanimi aamma nunanut allanut, sillimaniarnermut illersornissaqarfimmilu politikkimik eqqartuisarfimmik ataatsimiititaliaqalissasoq aamma oqaatsigineqarpoq.

Massakkut qaammatit sisamat qaangiutiinnartut -  attaveqartarnermut ataatsimiititaliaq pillugu atsiortoqarpoq. Ullumi ataasinngornermi Danmarkimi ataatsimiinermi tamanna pivoq.

Kalaallit Nunaannut iluaqutaassaaq

Ataatsimiititaliaq danskit ministeriinik, Savalimmiormiut naalakkersuisunut ilaasortanik nunatsinnilu naalakkersuisunik atorfilittanillu attuumassuteqartunik ilaasortaqassaaq. Ukiumut minnerpaamik ataasiarlutik, pisariaqartitarluuniit aallaavigalugu ataatsimiittassapput.

Ataatsimiititaliami naapittarnerit nunanut allanut, sillimaniarnermut illersornissaqarfimmulluuniit tunngasuusassapput, ilaasortalli oqaluuserisassanik allanik ilanngussaqarsinnaassapput. Tamanna suliakkiissummi saqqummiunneqaqqammersumi takuneqarsinnaavoq.

AAMMA ATUARUK Nunarput Savalimmiullu Issittumi Siunnersoqatigiinni pingaaruteqarnerusumik inissisimalissasut

Ataatsimiititaliap pilersinneqarneranut nunat akimorlugit suleqatigiittoqarusunneranik ersiutaasoq, Múte Bourup Egede, oqarpoq.

- Ataatsimiititaliamik pilersitsinikkut takutinneqarpoq nunatta akornanni akimut suleqatigiinnissamut patajaallisaanissamik ataatsimut soqutigisaqarnerput. Minnerunngitsumik nunatta namminneq soqutigisaannut ataatsimullu soqutigisaannut assigiinngiiaartut suliarinissaannut tunngatillugu.

- Taamaaliornikkuttaaq Kalaallit Nunaata nunarsuarmiooqataaleraluttuinnartumi nunanut tamalaanut attaviinut nammineq iliuuseqarnerulluni peqataanissaanut patajaallisaataassaaq "nammineq inissaqarnerulluni", tamannalu neriuuteqarfigilluinnarpara, taanna tusagassiorfinnut nalunaarummi oqarpoq. 

Nunanut allanut naalakkersuisoqarfik Múte Bourup Egedep naalakkersuisunngorfigeqqammerpaa. 

Tamanna Naleqqameersup Pele Brobergip sapaatip akunnerata siuliani peerneqarnissami tungaanut naalakkersuisuuffigigaluarpaa. Taannalu aviisimut Berlingskemut apersorneqarnerata kingunerisaanik peerneqarpoq. 

Tassanimi siunissami namminilivinnissamut taasititsisoqassagaluarpat, naggueqatigiit inuit kisimik taasisinnaatitaanissaanik oqariarrtuuteqarami.

Oqaaseqaat tamanna Naalakkersuisut siulittaasuata isumaqatiginngilaa.

Pingaaruteqartoq, Frederiksen oqarpoq

Suleqatigiinissamik isumaqatigiissut pingaaruteqartoq Mette Frederiksen isumaqarpoq. 

- Apeqqutit tamakku pillugit Danmarkip, Savalimmiut Kalaallillu Nunaatalu suleqatigiinnerunissaat, Danmarkip naalakkersuisuinut pingaaruteqarpoq .

- Paasissutissanik avitseqatigiittassaagut, ataqatigiissaarisassaagut qanimullu nunanut allanut sillimaniarnermut sakkutooqarnermullu immikkut Savalimmiunut Kalaallillu Nunaannut immikkut apeqqutit ittut suleqatigiissutigisarlugit, ministeriuneq oqarpoq. 

AAMMA ATUARUK Múte Marienborgimi: Nunanut allanut tunngasuni sillimaniarnermilu oqaasissaqarnerorusuppugut

Lagmandi, Bárður á Steig Nielsen, 'naalagaaffeqatigiit akornanni nutarsaanissaq pisariaqartoq' oqarpoq.

-  Atlantikup Imartaata avannarlermi Issittorlu sillimaniarnissaq pillugu politikeqarnikkut sammineqariartuinnarpoq, tamannalu pillugu Savalimmiut Kalaallillu Nunaata akuunissaat pingaaruteqariartuinnarpoq.

- Qularinngilara tamanna tamatsinnut iluaqutaassasoq, suliallu aallartinnissaa qilanaaraara.

Ataatsuimoorussamik allaffimmik, naalagaaffinni pingasuni taakkunanit ataatsimiinissamik aaqqissuisussanik atorfinittaqartunik, pilersitsisoqassaaq.