Canada: Ataatsimiititaliarsuup misissuinera naammassisoq

Tusarniaanerit kingulliit Ottawami sapaatit akunnerata siuliani ingerlanneqarput.

Ataatsimiititaliarsuup nunap inoqqaavisa arnartaasa toqutaasimanerannut periarfeerunneqarsimanerannullu pissutaasunik ukiuni kingullerni marlunni missuinerani, Canada tamakkerlugu tusarniaanerit 15-it sinnerlugit ingerlanneqarput nunap inoqqaavilu Inuit, Indianerit Métisillu 2000-init amerlanerusut aamma nassuiaatinneqarlutik.

AAMMA ATUARUK Ataatsimiititaliarsuup Quebecimi tusarniaanini naammassigai

Ataatsimiititaliarsuarmi siulittaasup Marion Bullerip aviisimut Globe and Mailimut oqaatigaa ajutoornernut pissutaasut hunnorujunik amerlanerusut paasineqartut, nalunaarusiaminnili pissutaasut qulit immikkut sammineqassasut.
 
Piitsuussuseq nunap inoqqaavisa amerlaqisut akornanni atugaasoq, aamma Inuit akornanni, nakuusertoqartarneranut pissutaanerpaat ilagivaat. Aamma ilinniagaqannginneq suliffissaaleqinerlu nunap inoqqaavisa arnaatasa nakuuserfigineqartarnerinut pissutaaqataasoq, Marion Bullerip oqaatigaa.

AAMMA ATUARUK Arnat periarfeerunneqartut pillugit ataatsimiititaliarsuup sulinera sivitsorneqartoq

Nakuuserneq pissutsillu allat Inuit, indianerit Métisillu arnartarpassuisa toqutaanerinut periarfeerunneqarnerinullu pissutaasut pillugit nalunaarusiaq ukiup affaata missaa qaangiuppat saqqummersinneqassaaq.