Ataatsimeersuarneq Ilulissat Climate Days 2015 aallartereerpoq
- Silap pissusaanut naalakkersuisutut akisussaasuusutut ullumikkut peqataasinnaagama, aammalu inuppassuit tunniusimalluartut qulequtaq pingaarutilik; tassalu silap pissusiata allannguutai, taakkualu inuiaqatigiinnut uatsinnut, ulluinnarni inuunitsinnut siunissatsinnullu sunniutai pillugit katersuunnerat misigisinnaagakku nuannaarutigisorujussuuara, Naalakkersuisoq Mala Høy Kúko ammaalluni oqalugiarnermini ilaatigut oqarpoq.
AAMMA ATUARUK Ilulissat Climate Days Ilulissani ingerlanneqalersoq
Silap pissusiata allannguutaasa inuiaqatigiinnut uagutsinnut ulluinnarnilu inuunitsinnut sunniutaasa aallunneqarnerat pingaaruteqartorujussuartut isigigini Naalakkersuisup ataatsimiinnermi oqaatigaa:
- Silap pissusiata allannguutai issittumi pinngortitamut najukkatsinnut asseqanngitsumut nutaanik sakkortunerusunillu allannguipput. Kisiannili aamma silap pissusiata allannguutai periarfissanik nutaanik nassataqarput, pisullu ilaanni unammilligassat periarfissanut sangutinneqarsinnaapput. Assersuutigalugu Naalakkersuisup ilaatigut umiarsuit angallannerat eqqaavaa, tassanilu piffissat sikoqanngiffiusut sivisunerulerneranni aqqutit nutaat ajornarunnaarsimapput.
Aamma Kalaallit Nunaata kujataani pissutsit peqqutaallutik naatitsinissaq ajornannginnerulersimavoq, Pinngortitamut Avatangiisinullu Naalakkersuisoq Mala Høy Kúko ilaatigut oqarpoq.
Silap pissusia pillugu ataatsimiinneq ”Ilulissat Climate Days 2015” aqagu tallimanngornermi naammassineqassaaq.