Ilulissat Climate Days Ilulissani ingerlanneqalersoq
Ilisimatuut 180-it nunanit 15-ineersut ataatsimeersuarnermut peqataassapput, sermersuarlu aakkiartuinnartoq imaatalu sikua milliartuinnartoq oqallisigissavaat.
Ilulissat Climate Days 2015, Ilulissat Timersortarfissuani ingerlanneqartussaq DTU Spacep Kalaallit Nunaata Silap pissusianik misissuisoqarfia, Islandimi silasiorfik Danmarkimilu ilisimatuussutsikkut sullissiviit arlallit suleqatigalugit aaqqissuunneqarpoq. Ataatsimeersuarnerlu europamiut avataarsuanik misissuisoqarfianit, amerikamiut avataarsuanik misissuisoqarfianit aammalu Nunat Avannarliit Ministerinut Siunnersuisoqatigiiffiannit tapersersugaavoq.
Ataatsimeersuarneq Ilulissat Timersortarfissuani marlunngornermi juunip aappaani nalunaaqutaq sisamanit arfineq-marlunut aaqqissuussinermik tamanut ammasumik aallarnerneqassaaq, innuttaasullu soqutiginnittut tamaasa qaaqquneqarput. Pinngortitamut, Avatangiisinut Inatsisinillu atuutsitsinermut naalakkersuisoq Mala Høy Kúko tikilluaqqusissaaq ilaatigullu Aatsitassanut Naalakkersuisoqarfimmi pisortaq Jørgen Hammeken-Holm saqqummiissalluni. Aaqqissuussineq tuluttut ingerlanneqassaaq kalaallisullu oqaluttaasoqarnissaa pilersaarutaavoq.