Politiit ullormut nalunaarutaat: Ataasinngornermi ullaakkut tillinniarnerit pingasut

Ullormi unnuamilu kingullermi tillinniarnerit, ammoniakkimik aniasoqarnera nunalu tamakkerlugu imminornissamik sioorasaarinerit pissutigalugit ulapaarsimanermik Kalaallit Nunaanni Politiit pigaartuisa pisortaat nalunaaruteqarpoq.

Allattoq Rasmus Balle Hansen

juunip 02-at 2025 11:08

Nutserisoq Tabetha Kreutzmann

- Tillinniartoqarsimaneranik nalunaarummik tigusaqaqqammerpugut, Kalaallit Nunaanni Politiini pigaartut pisortaat Carl Sværd oqaluttuarpoq.

Nalunaaqutaq ullaakkut arfineq-pingasup qaangerlugu tanneq pingasunngulersoq nukappiaqqat inuusuttuaqqat Nuummi naluttarfimmut Malimmut tillinniarsimasut nalunaartoqarpoq. Ullumikkullu illoqarfimmi tillinniartoqarneranik nalunaarutini tamanna siulliunngilaq.

Unnuaq, nalunaaquttap-akunnerata ataatsip ingerlanerani, KK Engros aamma Arctic Import tillinniarfigineqarsimapput – siulleq illup tunuatigut matukkut aappaalu matukkut silarlikkut isernikkut.

- Suut tillinneqarsimanersut suli oqaatigisinnaanngilarput, pigaartut pisortaat oqarpoq.

Tillinniarnerit taakku nalunaaqutaq sisamap qeqqalersoq aamma tallimap qeqqalersoq pisimapput.

Nunaqarfimmi ammoniakki aniasoq

Sisimiut eqqaanni Sarfannguani nunaqarfiup suliffissuaani ammoniakkimik aniasoqarsimasoq upalungaarsimasut sapaatiummat nalunaarfigineqarput. Isersimaannarnissamik aammalu igalaanik matunillu matoqqatitsinissamik innuttaasut piumaffigineqarput.

Akunnialuilli qaangiummata aniasoqarunnaarsimaneranik kiisalu inunnik ajoqusertoqarsimannginneranik upalungaarsimasut nalunaaruteqarmata innuttaasut silami anersaartorluaqqissinnaalerput.

- Aniasoqavinngilaq, ventililli naqitsineqarpallaarneraneersuuvoq, tamannalu iluarsineqareerpoq, pigaartut pisortaat Carl Sværd nassuiaavoq.

Itillimi aallaasersortoqartoq

Sapaammi ualikkut nalunaaqutaq pingasup missaani angut utoqqaq Itillimi angerlarsimaffimminit aallaammik aallartoorsimasoq politiit nalunaarfigineqarput.

Pigaartut pisortaat naapertorlugu inunnik allanik eqqaaniittoqarnera pissutiugalugu navianartorsiortitsisutut unnerluutigineqarpoq.

Imminut toqunnissamik siorasaarisut amerlasuut

Sapaatip-akunnerata naanerani nuna tamakkerlugu imminut toqunniarlutik sioorasaarisut imminoriartullu pillugit politiit arlaleriarlutik nalunaarfigineqarsimapput. Ulloq unnuarlu kingulleq aamma taamaappoq, Carl Sværd oqaluttuarpoq.

Piffissami kingullermi imminut toqunnissamik siorasaarisoqartarneranik nalunaartoqaqattaartarpoq.

Imminut toqunnissamik eqqarsaateqarninni ikiorneqarnissannik pisariaqartitsivit?

Kiserliorpit aamma oqaloqateqarnissannik pisariaqartitsivit?

Kisimiinngilatit. Piffissani inuunermi pisumiluunniit artornartorsiorfimmi, nammineq sapikkaminnik pisoqaraangat, inuit amerlanerpaat tusaaneqarnissartik pisariaqartittarpaat.

Tusarnaarnissamut piffissaqarpugut. Tusaanngap siunnersortai tusarnaartarput, ilungersuutivillu oqaasertalernissaanut ikiorsinnaallutit. Aamma illit inuuninni pissutsit artornartut qanoq iliuuseqarfiginissaanut sakkussannik tunisinnaavaatsit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit allallutilluunniit.

Telefon: 80 11 80

SMS: 1899

Tusarfik: Tusaannga

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.