Assit: Mette Frederiksenip Kim Kielsen tikeraarpaa
Sapaatiummat ullup qeqqata siorna ministriuneq Mette Frederiksen (S) Nuummut apuuppoq.
Ullup unnuallu ataatsip ingerlanerani socialdemokraatitut parteeqqatimineersoq Siumumeersoq Kim Kielsen tikeraarpaa. Tikeraarneralu allatut isikkoqaleriasaarpoq tallimanngormat naluinaarutigineqarmat Amerikamiut præsidentiata Trumpip Kalaallit Nunaat pisiarumallugu oqarnerarneqarmat. Trumpip nammineq sapaatiummat unnukkut ilumoornerarpaa.
Taamaattumik Mette Frederiksenip Kim Kielsenillu tikeraarnerup nalaani tusagassiortunut arlaleriarlutik utertariaqarpaat:
- Kalaallit Nunaat tuniniagaanngilaq.
AAMMA ATUARUK Mette Frederiksen: Kalaallit Nunaat tuniniagaanngilaq
Mette Frederiksen ministeriunertut siullermeerluni nunatsinnut tikeraarpoq. Tikinniariutaa Kapisilliarpoq. Tassani meeqqat angerlarsimaffiannit Meeqqat Illuaneersut tamaarsimaariartortut takusarpaat.
Isumaginninnermut tunngasorpiaat aamma marluullutik oqaloqatigiissutigaat. Kalaallit Nunaata meerartaasa ikiorneqarnissaat pillugu tuaviortumik iliuuseqartoqartariaqarpoq.
- Aalajangiunneqartoq tassaavoq isumaginninnermut ministereqarfiit taakku marluk suleqatigiinnermik aallarniissasut. Isumaginnittoqarfik Kalallit Nunaannit tiguneqareersimasoq pillugu Danmark nukittunerusumik inissisimasariaqarpoq. Ministereqarfiillu akornanni tuaviortumik inissinneqartariaqarpoq, danskit ministeriunerat oqarpoq.
AAMMA ATUARUK Mette Frederiksen aamma Kim Kielsen: Trumpip tikeraarnissaa sammineqangaatsiarpoq
Hans Egedep Illorsuani tusagassiortunik ataatsimiititsisoqartinnagu ataasinngornermi ullo’qeqqata siorna Grønlandsbanken, Royal Arctic Line aamma Issittumi Sakkutooqarfik pulaarneqarput.
Kingornatigut Mette Frederiksen nunat avannarliit ministeriunerisa Islandimi ataatsimiinnisaannut ingerlaqqippoq.