VIDEO Umimmaap assiliisartoq nassummigajakkaa

Dan Bach Kristensen quliliinissami tungaanut Nunatsinni najugaqarpoq, inersimasunngornerminilu Nunatta pinngortitarsua meeraalluni nuannareqisani uterfigiuarpaa - tamatumuuna sunngiffimmi soqutigisani aallukkumallugu, tassalu immap iluani assiliineq. Nunatsinnilu tamanna periarfissaqarluarpoq, soorlu eqaluit kuunni minguitsuni assilissallugit, ilaatigut umimmaat isiginnaartuliullugit.

Dan aggustip pingajuani Kangerlussuup eqqaani pisuttuarpoq, videoliaalu tassanngaanneersuuvoq. Umimmak tungiinnarminut aallarmat annilaaqaluni nillianera tusaaneqarsinnaavoq, allaanngilarlu umimmaap angutivissap Dan Bach Kristensen nassummigarnialeqigaa.

- Umimmammit aatsaat taamatut pineqarpunga. Umimmaat tuusintillit sanioqqutiinnartarpakka, aamma qimagutsinniarlugit tupassaarneqartarneri nalinginnaasuuvoq. Pisumili matumani allaanerulaarpoq, sinittormi naammattoorakku assilissallugu piukkutilerpara.

- Nipaarsaarlunga ornippara, taavali iterpoq takullungalu. Masseriarami ingerlaannaq tungiinnannut aallarpoq. Taamaaliorneralu assut tupassutigaara, Dan Bach Kristensen, KNR-imut taama nassuiaavoq.

Adrenalinanikkumagaanni
Qularutiginnginnerarpaa taamatut pisoqartillugu umimmak tununngallugu arpalluni qimaasoqartassanngitsoq. Aalajangersumik ingerlaannarlu iliuuseqarnissaq pisariaqarnerarpaa.

- Allatut ilioriarsinnaannginnama nilliaffigaara. Qamannga ilunnit nammineerluni takkuppoq, qujanartumillu umimmassuup unissutigaa. Sekundialunni adrenalina qaffariapiloorpoq.

- Taamatut pisut naammattoornikuunngisaannarpakka, umimmappassuit akornanniittaraluarlunga, Dan Bach Kristensen oqaluttuarpoq.

Video spejlreflekskameramik immiussaavoq, ersarissusia nammineq iluarsisassaalluni - taamaammat aamma umimmassuaq tungiinnarminut aallarmat iluarsiniarnissaa eqqarsaatigisimanngilaaluunniit.

Dan Bach Kristensenip videoliai allat uani isiginnaarneqarsinnaapput.