Assiliisartoq Qunerseeq Rosing ippassaq ualikkut toqukkut qimaguppoq
Naqqiut: allaaserisap siuliani allapparput Qunerseeq Rosing ullaap manna toqukkut qimaguttoq. Kukkuneruvoq, ippassaq sisamanngornikkut Qunerseeq Rosing toqukkut qimaguppoq.
Qunerseeq Rosing, assiliisoq nunatsinnilu ilisimaneqarluartoq ippassaq ualikkut toqukkut qimaguppoq.
Ernera KNR-imut ilisimatitsivoq.
Qunerseeq Tasiilami 1935-imi inunngorpoq. Qunerseeq Rosing 1959-imi assiliisartutut ilinniarnini naammassivaa assiliisartutullu sulinermini Kalaallit Nunaata ineriartornera nalunaarsorlugu. Atuakkiamini Inuit 2005-imi saqqummersumi Qunerseeq Rosing allappoq:-Atuagaq una assinik 82-nik, Kalaallit Nunaanni 1959-miit 1992-imut assilisanik, imaqarpoq.
Assiliisutut inuuninni inuit tikillugit, ilaatigullu sivisuumik inooqatigalugit assilisarsimavakka.
Assilisat piffissami tassani nunatsinni inuunermik oqaluttuartuupput takussutisseeqataallutik.
Atuakkiap 2005-imi saqqummernerani Jyllandsposten allappoq: Qunerseeq Rosing Kalaallit Nunaata nunasiataanerani peroriartorpoq assiliisup tusaamasap Jette Bangip Kalaallit Nunaanni inuunermik nalunaarsuisutut kingoraartaatut taasariaqarlunilu. Ilisinissaq suli ullulerneqanngilaq.
