Asseq torrallataq nunatsinni assilisaavoq

Ukallinik taakkuninnga assiliisuuvoq igasoq assiliisartorlu Morten Hilmer, assilisaalu taanna pinngortitaq pillugu assilisani ukioq manna ajugaasuuvoq.

Assiliisartut 109-t unamminermi peqataapput, assit 500-nit amerlanerusut ajugaaniussutaallutik. Morten Hilmerip akissarsiarai aningaasat angalanermut atugassat 20.000 koruunit.

Asseq ajugaassutaasoq Tunup Avannaani 2008-mi assilisaavoq. Morten Hilmer tappavani silasiorfimmi qaammatini pingasuni igasuusimavoq. Sunngiffimmini asimi angalaarnissani nuannarilluinnarpaa, assiliivilisartuartuullunilu. Sila tappavani unammillernartorujussuusarpoq, ilaatigummi 30-t angullugit issittarmat.

- Nunami pallorluni ukallimik assiliiniartilluni ukaleq alla qanillattortoq takoriasaarsimavaa. Ukallip assiliniagaata ukaleq takkuttoq saassussimavaa, Morten Hilmerimiillu meterinik 30-nnarnik ungasissuseqarlutik ukallit paasimapput. Paanerat sekundtialunnguaannarnik sivisussuseqaraluarpoq, kisianni tassa sunaaffa ajugaassutissaminik torrallavillugu assiliilluni. Aviisip Politikenip nittartagaani tamanna allaaserineqarpoq.

Morten Hilmerip assilisarpassui, Danmarkimi illoqarfinni assigiinngitsuni saqqummersinneqaqattaarput, maanna Londonimi Katersugaasivissuarmi, National History Museumimi, saqqummersinneqarlutik.

Morten Hilmer "Pinngortitamik Ukiup Assiliisuatut" aamma toqqarneqarpoq.