Assammik arsartartut VM-imut anngunniutissamaalerput
Nunatta assammik arsarlutik nunanut allanut unammisartui, Helsingørimi sapaatip akunnera una sungiusaatigalugu katerisimaartinneqarput.
- Naatsorsuutigineqarsinnaavoq Argentinap aamma Brasiliap normu 1-inngorsinnaanerat normu 2-nngorsinnaanerallu, taamaammat ilimanarpoq normu 3-nngorniuuteqqinnissarput. Tassanilu Chilemut, Cubamut Canadamulluunniit unamminissarput ilimanarpoq, unammisartut misilittagartoortaat Rasmus Larsen KNRimut oqarpoq.
Nunatta assammik arsarnermi unammisartuisa sungiusaasuata, Niels Møllerip, isertuutinngilaa, unammisartut ukiumut marloriaannarlutik sungiusaqatigiittarmata, sungiusaqatigiisillugit unammisinneqartarneri unamminartuusoq.
- Unammisartut ukua naapisinneqarnerat akisuvoq, taamaattumik sulinitsinni atugassaritaasut allaanerupput, Niels Møller oqarpoq.
Assersuutigiinnarlugumi Helsingørimut angalatinneqarnerat kattuffimmut 150.000 koruuninik naleqarsimavoq.
Nunatta assammik arsarlutik unammisartui assigiinngiiaartunik inuttaqarput, ilaat inuusunnerupput, ilaat sungiussisimasut, ilaat Qallunaat Nunaanni unammisartunut ilaasortat, ilaallu Nunatsinni unammisartuneersuullutik.
- Kinguaariit unammisartut kingulliit suleqataaffigalugit pissanganarput. Assut anguniagaqarusupput, pitsaasumillu inissikkusullutik. Taamaattumik Qallunaat Nunaanniit unammisartooreersut inuusuttullu aqqanillit, tamarmik GSS-imeernerusut, ataatsimoortinnerat pissangarnarpoq, tamanullu kajumissuseqalersitsilluni, Niels Møller oqarpoq.
Anguniarneqartoq tassaavoq Panamerikamiut pissartanngorniunneranni pikkorinnerit pingasut akornannut inissinnissaq pikkorinnerit pingasut VM-imut annguttussaammata.
Unammisartunut nutaatut ilannguttut ilagaat Michael Lucacs. Taanna Nunatsinnut annertunerusumik attuumassuteqanngikkaluarluni unammisartunut ilanngunneqarsimavoq.
- Kalaallit Nunaanniinnikuuvunga ukiut 20-it matuma siornatigut, ataatanga iffiortuusoq ilagalugu. Taamaattumik klubbi ilaasortaaffigisara siulleq Kalaallit Nunaannneerpoq, tamannalu tunngavigalugu maanna unammisartuni peqataasinnaatitaallunga. Peqataanera unamminarpoq nuannerlunilu, Michael Lucacs KNR-imut oqarpoq.
Nunatta assammik arsarnermi nunanut allanut unammisartui Nordsjælland Håndbold-imut unamminerminni ajorsarput, divisionsreserverinulli unamminerminnut ataasinngormat unnukkut ajugaasinnarlutik, svenskit unammisartuinut Lugimut marlunngormat ajorsarlutik.
