Assammik arsartartut anngunniuuttussanngorput

Niels Møllerip sungiusagai nunarsuarmi pissartanngorniuunnissamut anngunniarunik pitsaanernut pingasunut ilaasariaqarput.

Peqataanissaminnut piareersarlutik sungiusartorujussuupput. Sungiusaatigalugulu Ringstedimi ippassaq unammipput, ataasiarlutik aamma sungiusaatigalugu unammeqqissallutik.

Kalaallit nunanut allanut unammisartuisa Dalbymeersut Holtemi Ringstedimilu divisionimi unammisartunik ilallit unammivaat. Kalaallillu 31-25-mik ajugaapput.

Ajugaanertillu Argentinami anngunniuunnissamut qularutissanngtsumik qiimmattaatigisorujussuaat.

Pan-Amerikami pissartanngorniuunnermi Chilemut unammeqqaalerunik, unamminerminni qanoq saassussisassanerlutik assersuisassanerlutillu inissititserniartorujussuaat.

Unammineq aallartiinnartorli kalaallit arsarlualerput. Ilimagineqarpoq kalaallit Chilemut semifinalimi aamma unammissagaat.

Kalaallit nunanut allanut unammisartui sungiusarnertik naggataarlugu FIF-mut Frederiksberghallenimi sisamanngorpat unammissapput.

Pan-Amerikami pissartanngorniuunnermi Argentina, Cheli, USA Venezuelalu unammissavaat.

Puljeni pitsaanerit marluk semifinalinut ingerlaqqissapput, angusarissaarnerpaallu ujamminnattut pingasut nunarsuarmi pissartanngorniuunnermi 2013-mi peqataassapput.

Spaniami nunarsuarmi januaarimi pissartanngorniuuttoqalerpat nunat assammik arsallaqqittortalissuit peqataatitaqassallutik.

Assammik arsaattartut Argentinamut tallimanngorpat aallassapput ataasinngorpamiillu unammisarnitik aallartissavaat.

Chilemut ataasinngorpat juunip 18-ani unammissapput Argentinamut aqaguani unammissallutik.

Inuiattut ullorsiorfitsinni USA-mut unammissapput, puljeqatiminnut Venezuelamut aqaguani unammissallutik.

Semifinalit ujaminnanniuunnerillu sapaatip akunnerata naanerani, juunip 23-anni 24-annilu unammissutigineqassapput.