Assammik arsartartut angutit tulleriiginnarnik pingajussaa ajugaapput
Kalaallit Nunaat ajuunnernik arfineq-marlunnik siuaqqalluni ajugaavoq, unamminerlu 31-24-mik inerneqarpoq.
Kalaallit unamminerup annersaani siuaqqapput unamminerullu muminnerani 18-11-mik siuaqqallutik. Unamminerullu ingerlanerani Mexicop Kalaallit Nunaat ikitsoriaannarluni angungajattarpaa. Taamaalisoqarneranilu Mexicomi timersortarfissuarmi isiginnaartut qiimmaallarujussuartartut, nunanut allanut unammisartut sungiusaasuat Niels Møller taama allappoq.
Dommerit naliliisarnerat ippassaq unamminermi aamma naammagineqarpallaanngilaq. Unammineq tamaviaarfiunngikkaluartoq, unammisartut 20-t unisitaanerat pissutigalugu nuannerunnaarsinneqarpoq. Anitaanernullu pissutaasut dommerit kisimik takusinnaasimavaat.
- Unamminerup ingerlanerani unammisartuvut pingasut ataatsikkut anisitaaqqapput, taamaakkaluartorli Mexico siuartinnaveersaarparput, Niels Møller oqarpoq.
Unamminermi ajuunnerpaaq tassaavoq Akutaaneq Kreutzmann arfineq-pingasoriarluni ajuuttoq. Taanna Danmarkimut timmisartoq angumeriumallugu ingerlajaartariaqarsimavoq, GOG sinnerlugu arfininngorpat unammisussaanini pissutigalugu. Ingerlajaarnerali maangaannarpoq. Timmisartortitseqatigiimmi timmisartumut ikissutissaa anillatsissinnaasimanngilaa, taamaattumillu aallanngitsoorluni. Taamaalilluni GOG-p ukiormanna unamminissaanut kingullermut peqataasinnaajunnaarpoq, nunanulli allanut unammisartut ajuullaqqissortartik USA-mut unnugu unammilerunik imaallaat iluaqutigissavaat. Unammineq nunatsinni nalunaaqutaq malillugu unnugu arfineq-marlunut aallartissaaq.
Nunarput tulleriiginnarnik pingasunik ajugaareerluni siuttuuvoq - USA-lu unamminerni kingullerni marlunni ajugaassagaluarpat siuttuujunnaarsissinnaavaatigut, nunanut allanut unammisartut sungiusaasuat Niels Møller Mexicomit taama oqaluttuarpoq. Kalaallit Nunaat Panamerikamiut pissartanngorniunnerinut anngutereerpoq, pissartanngorniunnermilu tassani nunat pingasut 2015-imi VM-ertoqarnissaanut Qatarimi pisussamut ingerlaqqissapput.
