Assammik arsarnermi kalaallit dommerit nunani tamalaani peqataasalersut
Enok Petersen aamma Erni Johansen nunani tamalaani dommerioqqaarnerminni suliaminnik naammassinnilluarput. Maann Chicagomiipput tassani amerika avannarlermiut caribiamiullu decemberimi Spaniami VM-qarnissaanut anngunniummata. Tassani kalaallit arnat aamma peqataapput.
Dommerit suli inuusoqisut Puerto Ricop aamma Mexicop ataasinngornermi unnukkut unammineranni dommeriupput naliliisartunillu nersualaarneqarlutik.
- Dommerinik inerisaasartup aamma amerika avannarlermiut caribiamiullu assammik arsarnermi kattuffiata NACHCp Erni Johansen aamma Enok Petersen nersualaarpaat, Timersoqatigiit assammik arsartartut kattuffianni siulittaasoq Carsten Olsen nalunaarpoq.
Kalaallit dommeriusut nunani tamalaani dommerioqqaarnertik naammassiinnarlugu Nunatta avataani pisussamut allamut qaaqqusaapput.
- NACHC-mit aamma Mexicomiunit angutit arnallu inersiimasut Mexicomi pissartanngorniunnerannut dommiujartoqqusaapput tamannalu Mexico Citymi novemberip 19-at aallartissaaq, Carsten Olsen nangippoq.
Tupaallapput
Qaaqqusissummut Enok Petersen aamma Erni Johansen akuersaarput taamatullu qaaqqusaanertik tupaallaatigalugu.
- Inersimasut Mexicomi pissartanngorniunnissaannut peqataaqqusaanerput assut tupaallaatigaarput, soorunami aamma akuersaarpugut angalanissamullu qilanaalereerluta, Enok Petersen aamma Erni Johansen oqarput.
- Nuannaarutigaarput ineriartornerput TAAK-mit tapersersorneqarmat neriuppugullu alloriarnertut tullertut nunavittami dommeriusartutut inissikkumaarluta, kalaallit dommerit oqarput.
Nunavittamili dommeriusartutut taasinnaalernissamut suli aqqut takivoq. Tassami taamatut inississagaanni nunat tamalaat unammineranni dommeriunerit aqqusaaqqaarlugit qaffakkiartorsinnaapput.
Mexicop aamma USAp bronzennaniunnerat unnugu nalunaaqutaq qulinut KNR-TV-mi toqqaannartumik isiginnaarneqarsinnaavoq tassanilu Enok Petersen aamma Erni Johansen dommeriussapput. Kalaallit aamma Puerto Rico nalunaaqutaq quliniit finalessapput tassanilu ajugaasut decemberimi VMip naggataarneqarnissaanut anngutissapput.
