Assammik arsarneq: Cubap peqataaniarunnaarneratigut kalaallit periarfissaat pitsanngoriarput
Arnat assammik arsartartut 17-sut Nuummi sungiusaqatigiinerat pingasunngornermi unnukkut naammassivoq.
Maanna unammisartut sungiusaasup Anders Friisip sianernissaa utaqqiinnalerpaat sungiusarnermi takutittartik augustimi USA-mi VM-mut anngunniuteqataanissamut naammannersoq.
Unammisartut arlallit Danmarkimi najugaqartut sungiusaasoq Anders Friis ilanngullugu sungiusaqataanngillat nalunaaqqaarluni aaqqissuusinermi mattusimagallarnissamut malittarisassat aporfiummata. Assammik arsartartut kattuffianni siunnersorti aamma siornatigut akissarsiutigalugu assammik arsartartoq Akutaaneq Kreutzmann sungiusarnermi aqutsisuuvoq.
AAMMA ATUARUK Kalaallit arnat assammik arsarnermi VM-mut annguteriartussanngorput
Anngunniunnissamullu pissangaammerneq allivoq kingullermik anngunniuttoqarmat ukiut marluk matuma siorna ajugaasut Cuba peqataaniaratik nalunaaruteqarmata.
- Imaanngilaq Cuba peqaaniarunnaarmat tassa VM-mut anngunnissaqq qulakkeeripput naak periarfissavut pitsaaneruleraluartut, Akutaaneq Kreutzmann oqarpoq.
- Pereersut aallaavigalugit piareersarnianngilagut siumulli isigissaagut arnat pillugit pilersaarutaareersoq malillugu, Akutaaneq Kreutzmann oqarpoq.
Naligiissaqaat
Maannamuugallartoq VM-mut anngunniunnermi peqataaniarlutik nalunaartut tassaapput: Kalaallit Nunaat, Mexico, Puerto Rico aamma USA. Den Dominikanske Republikimeersut USA-mut isersinnaanissamut akuersissut suli qulakkeerniarsarivaat.
Unamminerit naligiiffiusinnaalluarput. Kingullermi VM-mut anngunniuttoqarmat Kalaallit USA-lu naligiiginnarput aammalu Kalaallit Puerto Ricomut målinik sisamanik ajorsarlutik. Unammersuarnermi tassani kalaallit Den Dominikanske Republik målinik marlunnik ajugaaffigaat.
- Saassussinermi ammaariaatsit sungiusaqatigiinnermi sammivagut taakkulu uteqqeqattaangaatsiarlugit. Assersuineq aamma sammivarput assersuinermi pisuni assigiinngitsuni kina siumukassanersoq pillugu isumaqatigiissutit inissilluarniarlugit, Akutaaneq Kreutzmann oqarpoq.
- Arsartut Nunatsinni najugaqartut amerlaqimmata saassussinermi ammaariaatsit sammiinnarsinnaavagut. Taamaasilluni arsartut Danmarkimi najugallit ajornaquteqannginnerusumik ilanngussinnaapput, Akutaaneq Kreutzmann oqarpoq.
VM-mut anngunniunneq USA-mi Chicagomi augustip 23-niit 27-ta tungaanut pissaaq USA-mullu aallarnissaq sioqqullugu kalaallit unammisartut Danmarkimi sungiusaqatigiissapput.
VM-mut anngunniunnermi kalaallit unamminerisa aallakaatissinnaanissaat KNR-TV-mit misissorneqarpoq.
