Kalaallit arnat assammik arsarnermi VM-mut annguteriartussanngorput
Nunarsuup ilaani kalaallit peqataaffigisagaanni dommeri siggartinnagu nalorninartoqartuaannarpoq.
VM-mut anngunniunnissani tulliuttuni pissutsit aamma taamaapput.
Amerikap avannaamiut Caribiamiullu kattuffianni NACHC-mut naalisarneqartartumi VM-mut anngunniunnerit USA-mi junip naalernerani pissapput.
- Kisianni ilisimatinneqarpugut allannguisoqarsinnaanera sillimaffigissagipput, nuna tamakkerlugu arnat assammik arsartartut sungiusaasuat Johannes Groth KNR-mut oqarpoq.
USA coronami sakkortuumik eqqugaavoq 400.000-nit amerlanerusut coronamik pissuteqartumik toqupput tunillatsittullu 26 millioniullutik.
Taamaattoq kalaallit arnat assammik arsartartut sungiusarnertik ingerlappaat naak iligiit tamarmiullutik sungiusaqatigiissinnaanerat aatsaat pisinnaagaluartoq inuit katersuussinnaanerannut killilersuutit qasukkartinneqarpata.
- Sungiusarnitsinni arsartut ataasiakkaat piumassusaat apeqqutaasorujussuuvoq. Internet atorlugu arsartut attavigisarpavut aamma sapaatip akunnerani aggersumi tamattaalluta internettikkut ataatsimiittussaalluta, Johannes Groth oqarpoq.
Sungiusaqatigiinnissat arlaallit Nunatsinni Danmarkimilu pisussaagaluit qatagiinnarnikuupput corona pissutigalugu.
Arnat assammik arsartartut anguniagaqarput ukiormanna VM-mut anngunniunnermi finale angoriassallugu ukiullu marluk qaangiuppata VM angoriavissussallugu.
