Assammik arsarlutik nunanut allanut unammisartut unamminissaminnut piareerput
Kalaallit unammisartui Argentinamut unammissapput - taakkulu unamminermi ajugaasussatut ilimagineqarlutik.
Argentina, Chile aamma Mexico Kalaallit Nunaata puljeqatigai. Nunanut allanut unammisartut sungiusaasuata Niels Møllerip nittartakkami Sermitsiaq.AG-mi apersorneqarluni isertuunnagu oqaatigaa, unamminissat sakkortussasut tamaviaarnassasullu.
- Taamaallaat pulje-mi unamminissami kingullermi, Mexicomut unamminissatsinni ilimagineqarpugut. Mexico inuusuttunik sungiussisimanngitsunik unammisartoqarpoq, ajugaaffigisinnaalluarpavullu. Mexico piumassuseqarluni unammisarpoq, taamaattumik ajugaassagutta tamaviaassaagut. Argentinamut Chilemullu unamminissat ajornakusuussapput, Niels Møller taama naliliivoq.
Nunanut allanut unammisartut Miki Heilmannip, Miilu Rosingip Jakob Larsenillu peqataasinnaannginnerat suli ajuusaarutigaat.
Sungisarnermi unammeqatigiilluarsinnaanerpaat nassaariniarneqarput.
Argentinami ukiut marluk matuma siornagut pissartanngorniunnernut sanilliullugit, nunanut allanut unammisartut qulingiluanik nutaartaqarput.
Illoqarfiup Canelonesip unammisarfiani unammisaqattaartoqassaaq. Canelones 20.000-it missaannik inoqarpoq. Unammisartut Montevideo-mi akunnittarfiannit Canelionesimut busserneq akunnerup ataatsip missaanik sivisussuseqarpoq.
Unamminissat allat marluk ullumi pisussat puljet aappaanneersuupput, tassani siullermik Brasilia Venezuelalu unammissallutik, tulliullutillu USA Guatemalalu unammissallutik.
Kalaallit Argentinamut unamminerat Nunatsinni nalunaaqutarput naapertorlugu unnugu arfineq marlunut pissaaq taannalu nittartakkakkut panamhandball.org-ikkut toqqaannartumik malinnaavigineqarsinnaavoq.
