Aslak Jensen pinngitsuutinniarneqarpoq. Assi: KNR

Aslak Jensen pillugu eqqartuussut aalajangiiffigneqartussanngortoq

Siumumit politikeri, Aslak Jensen Nuummi ullumi eqqartuussaassaaq. Taanna isumaginninnermik suliaqartumut politiinullu toqutsinissamik siorasaaruteqarsimasutut unnerluutigineqarpoq.

Aslak Jensen Kommuneqarfik Sermersuup inunnik isumaginnittoqarfianut 2017-imi martsip 17-iani nalunaaqutaq 12:45-p missaani sianersimavoq, tassanilu isumaginninnermik sulialik toqunniarlugu siorasaarsimallugu.

Unnerluussisummi allassimasut malillugit Aslak Jensen oqarasuaatikkut ilaatigut ima oqarsimavoq:

- Ilissi politeersuillu toqorassuassi.

- Kinaanerit ujartussuakkit. Utaqqilaarit toqussuakkit.

AAMMA ATUARUK Inatsisartunut ilaasortaq toqutsinissamik siorasaarisimasutut unnerluutigineqartoq: Pinngitsuunerarpoq

Unnerluussut naapertorlugu tamanna pillugu isumaginninnermi sulisoq inuunerminik, peqqinnerminik atugarissaarnerminillu assut ersiulersimavoq.

Pinngitsuunerartoq

Aslak Jensen Siumumit Inatsisartunut qinigaanerpaat pingajuat unnerluussissutigineqartuni pinngitsuunerarpoq. Ukiakkut ataatsimiinneq aallartimmat Inatsisartuni ilaasortat allat taassuma unnerluutigineqarsinnaannginnera aorunnaarsippaat. Inatsisartunimi ilaasortat politiinit eqqartuussivimmiluunniit suliami unnerluutigineqaqqusaanngillat.

Tamanna Inatsit tunngaviusuni allassimavoq – taakkulu unnerluutigineqarsinnaannginnerata atorunnaarnissaannut – taamaalillutillu unnerluutigineqarsinnaanissaannut eqqartuunneqarsinnaanissaannullu – Inatsisartut taasissuteqaqqaartassallutik.

Aslak Jensen unnerluutigineqartuni pinngitsuunerarpoq.

- Eqqartuussivimmi sassarnissara ernumassutiginnginnakku, Aslak Jensen KNR-imut septembarimi oqarpoq.

Taassuma illersuisata tamanna uppernarsarpaa:

- Pinngitsuutinneqarnissaa piumasaraarput. Eqqartuussiviup pisuutitsinissaq aalajangissappagu sakkukitsumik pineqaatissiisoqarnissaa anguniassavarput, illersuisoq, Finn Meinel KNR-imut oqarpoq, nangillunilu:

- Ataasinngorpat eqqartuussisoqassappat, taava inerneri qimerlooriarlugit qanoq isumaqarfigissanerigut nalilissavarput.

Siumumit eqqartuussivimmi suliarineqartut pingajuat

Aslak Jensen taamaalilluni Siumut sinnerlugu qinikkani saqqumilaarnerit, inatsisartunut kommunimullu qinersinerup kingorna eqqartuussivimmut suliassanngortinneqartut eqqartuusaasulluunniit pingajorilerpaat.

Siumumit Minik Høegh Dam Avannaata Kommuniani qinerneqarnerpaatut borgmesterinngortussatut inissereeraluarluni uppisinneqarpoq. Taanna ikiaroornartut pillugit unnerluunneqarpoq. Minik Høegh-Dam eqqartuussivimmi pinngitsuutinneqarpoq, unnerluussisussaatitaasulli suliaq Nunatta Eqqartuussisuuneqarfianut suliareqqitassanngortippaa.

Taassuma nukaa, Siumumilu Inatsisartunut qinerneqarnerpaat sisamaat, Qarsoq Høegh Dam, qinersinerup kingorna Inatsisartuni ilaasortaanissamut piukkukkunnaarami nammineerluni ilaasortaajunnaapoq. Taassumami ikiaroornatoq pillugu eqqartuussaasimanini pissutigalugu Inatsisartuni amerlanerussuteqartut piukkunnangitsutut taasinissaat naatsorsuutigisimavaa.

Eqqartuussisoqarfik Sermersuumi eqqartuussineq nalunaaqutaq 9.00 aallartinneqassaaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl