Aslak Jensenip eqqartuussaanini akueriinnaraa
Siumumeersoq, Aslak Jensen, pinerloqqissagaluaruni pineqaatissinneqarsimasunut ulluni 20-ni inissiisarfimmiittussanngorluni Eqqartuussiveqarfik Sermersuumi januaarimi eqqartuussaavoq.
Aslak Jensenilli eqqartuussaariitsiarluni tamanna Nunatta Eqqartuussisuuneqarfianut suliareqqitassanngortimmagu ullumi pingasunngornermi suliarineqartussaagaluarpoq. Taamaaliortoqanngilarli. Aslak Jensenimmi eqqartuussaanini akueriinnarmagu, suliaq taanna taamaatippoq.
- Eqqartuussaanera suliareqqitassanngortikkatsigu unnerluussisussaatitaasut taassuma sivisunerusumik pineqaatissinneqarnissaa anguniarlugu aamma suliareqqitassanngortitsipput. Aslakillu suliareqqitassanngortitsinini taamaatippaa unnerluussisussaatitaasullu suliareqqitassanngortitsinertik aamma taamaatippaat, Aslak Jensip illersuisua Finn Meinel oqarpoq.
Tassa suliaq taanna inaarpoq.
Taamaammat Aslak Jensen ukiumi aggersumi pinerloqqissagaluaruni pineqaatissinneqarsimasunut ulluni 20-ni inissiisarfimmiittussanngorluni eqqartuussaavoq.
Aslak Jensen Kommuneqarfik Sermersuup inunnik isumaginnittoqarfianut 2017-imi marsip 17-iani sianerluni isumaginninnermik suliaqartumut toqutsinissamik sioorasaaruteqarsimasutut unnerluutigineqarpoq. Pinerluttuliornermut inatsimmi pisortani suliffeqartumut tunngasumik paragraf 37-mik unioqqutitsisimasutut unnerluutigineqarpoq.
Aslak Jensen pinerluttulerinermi inatsimmi paragraf 37 naapertorlugu unnerluutigineqarpoq:
"Pisortat oqartussaatitaannik narrunarsaasutut eqqartuunneqassaaq kinaluunniit nakuuserluni imaluunniit nakuusernissamik sioorasaaraluni imaluunniit asissuilluni, oqaasipilulluni imaluunniit allatut ajuallaataasumik oqalulluni saassussisoq inummik, pisortani kiffartuumminik imaluunniit suliassaminik imaluunniit tamakkununnga atatitamik suliaqartilluni iliuuseqarnissaminut pisussaaffeqartumik".
Eqqartuussivimmi suliaq kommunip Aslak Jensenip ilaqutaanut tunngatillugu aalajangiuteqarsimaneranik tunngassuteqarpoq.
AAMMA ATUARUK Siumumit politikerip eqqartuussivimmi suliassanngortitseqqinnera septembarimi aallartissasoq
Aslak Jensenimit marsip 17-iani sianerfigineqarsimalluni, ilisimannittoq Kommuneqarfik Sermersuup inunnik isumaginnittoqarfiani sulisuusoq oqarpoq.
Taassumalu oqarnera naapertorlugu Aslak Jensen oqarasuaatikkut ima oqarpoq:
- Ilissi politeersuillu toqorassuassi.
- Kinaanerit ujartussuakkit. Utaqqilaarit toqussuakkit.
Aslak Jensenili taama oqarsimanerluni eqqaamannginnerarpaa, taamali oqarneragaasimanera eqqartuussisup aalajangerneranut aalajangiisooqataavoq.
Inatsisartunit tunuartoq, politikkimilli tunuanngitsoq
Aslak Jensen Inatsisartunit tunuarluni septembarip 23-ani nalunaarpoq.
Tamanna pillugu tusagassiuutinut ima nalunaarpoq:
- Inuttut aqqusaarsimasakka pissutigalugit taamak aalajangersimavunga. Aalajangerneq taanna uannut soorunami imaannaanngilaq. Tamanna isumaqanngilaq politikki qimakkiga, kisianni tassa qinikkatut sulinera unitsikkallassallugu aalajangersimavunga, tamannalu ataqqillugu paasineqassasoq kissaatigaara.
AAMMA ATUARUK Aslak Jensen Inatsisartunit tunuartoq
Aslak Jensen Inatsisartunut 2021-mi qinersinermi 814-inik taaguunneqarluni Siumumi taaguunneqarnerpaat pingajoraat.
Aslak Jensenip pineqaatissinneqarnerminik akuersiinnareernermini KNAPK-p siulittaasuanut tullersortaaginnarsinnaanersoq suli nalunarpoq.
KNAPK-meersumik tamanna pillugu oqaloqateqarniarsimagaluarpugut, tamannali pillugu apersorneqarnissaminnut suli maannamut periarfissaqarsimanatik.
