Siumumit politikerip eqqartuussivimmi suliassanngortitseqqinnera septembarimi aallartissasoq
Aslak Jensen pinerluuteqaqqissaguni ulluni 20-ni pinerluuteqarsimasunut inissiisarfimmiittussanngortillugu eqqartuussivimmit pineqaatissinneqarnikuuvoq.
Siumumeersulli, Aslak Jensenip eqqartuussut nunatta eqqartuussisuuneqarfianut suliarineqaqqittussanngortinnikuuaa, eqqartuussivimmilu suliaq septembarip ulluisa tallimaanni nalnaaqutaq 09.00 suliarineqartussanngortoq, Nunatta Eqqartuussisuuneqarfia KNR-imut paasissutissiivoq.
Aslak Jensen pinerluttulerinermi inatsimmi paragraf 37 naapertorlugu unnerluutigineqarpoq:
"Pisortat oqartussaatitaannik narrunarsaasutut eqqartuunneqassaaq kinaluunniit nakuuserluni imaluunniit nakuusernissamik sioorasaaraluni imaluunniit asissuilluni, oqaasipilulluni imaluunniit allatut ajuallaataasumik oqalulluni saassussisoq inummik, pisortani kiffartuumminik imaluunniit suliassaminik imaluunniit tamakkununnga atatitamik suliaqartilluni iliuuseqarnissaminut pisussaaffeqartumik".
Aslak Jensen suli pinngitsuunerarpoq, taassuma eqqartuussissuserisuatalu Finn Meinelip pinngitsuutitsisoqarnissaa anguniarpaat. Eqqartuussivimmi suliaq eqqartuussivimmi suliarineqarmat aamma tamanna piumasaqaatigaat.
- Pinngitsuutitsisoqarnissaa suli kissaatigaarput. Nunattali Eqqartuussisuuneqarfia pineqaatissiissappat tamanna eqqartuussiviup pineqaatissiissutaanit sakkukinnerussasoq neriuutigaarput, Finn Meinel KNR-imut oqarpoq.
Aslak Jensen Kommuneqarfik Sermersuup inunnik isumaginnittoqarfianut 2017-imi martsip 17-iani sianerluni isumaginninnermik suliaqartumut toqutsinissamik siorasaaruteqarsimasutut unnerluutigineqarpoq. Pinerluttuliornermut inatsimmi pisortani suliffeqartumut tunngasumik paragraf 37-mik unioqqutitsisimasutut unnerluutigineqarpoq.
Eqqartuussivimmi suliaq kommunip Aslak Jensenip ilaqutaanut tunngatillugu aalajangiuteqarsimaneranik tunngassuteqarpoq.
Siorasaarisimanerminik eqqaamasaqanngitsoq
Unnerluussut naapertorlugu Aslak Jensen Kommuneqarfik Sermersuumi isumaginninnermik suliaqartumut oqarasuaatikkut ima oqarpoq: - Kinaanerit ujartussuakkit. Utaqqilaarit toqussuakkit.
AAMMA ATUARUK Siumumi politikerip eqqartuussaanera: Pinerluuteqaqqissaguni ulluni 20-ni pineqaatissinneqarsimasunut inissiisarfimmiissasoq
Taassuma suliaq Eqqartuussisoqarfik Sermersuumi suliarineqarmat tamanna ilisarinnginnerarpaa. Taassumalu kommunip inunnik isumaginnittoqarfianut sianersimanini eqqaamanerarpaa, siorasaaruteqarsimasorinanilu.
- Toqussavakkimmik oqarninnik eqqaamasaqanngilanga. Suliaq tamaat misissuiffiginiarlugu oqaatigaara, eqqartuussivimmi oqarpoq.
Aslak Jensen Inatsisartunut siorna apriilimi qinersinermi 814-init taaguunneqarluni Siumumit taaguunneqarnerpaat pingajoraat.
Taanna Inatsisartuni aalisarnermut, piniarnermut nunalerinermullu ataatsimiititaliaanni siulittaasumut tullersortaanikuuvoq. Atuuffilli taanna Naleqqap apriilimi naalakkersuisoqataajunnaarnerani ataatsimiititalianilu ilaasortat allanngornerani atuuffigiunnaarpaa.
Naqqiissut: Aslak Jensen Inatsisartut aalisarnermut, piniarnermut nunalerinermullu ataatsimiititaliaanni siulittaasumut tullersaasoq ilanngutassiami siusinnerusukkut allaqqaluarparput. Tamanna eqqunngilaq. Taannali Aalisarnermut ataatsimiititaliami apriilip tungaanut siulittaasumut tullersortaavoq.
