Asiip seqinnarinnera nuannaarutigaa
Asii Chemnitz Narupip aamma borgmesterioqqissanerluni neriorsuutigisinnaannginnerarpaa.
- Pisortatigoortumik suli eqqartunngilarput, kisianni partiitsinni ajugaasuuvugut partiinilu anginersaalluta, tamannalu immikkut inissisimalersippaatigut innuttaasunullu ersarissumik oqariartuuteqarsimasunut pisussaaffilerluta, oqarpoq.
Demokraatit isumaqatigiinniaqatigineri illarpaluttarput aammalu ataatsimiinnermit anillakkamik qungujulasupilussuullutik. Borgmesteriusullu tamanna arlaatigut tikkuussinersoq oqaaseqarfigerusunngilaa.
- Inuiaavugut illarumatuut, tassa taamaappoq, mannalumi seqinnarik, Asii Chemnitz qungujulaarluni oqarpoq.
Thomas Kristensenip Atassummeersup IA ippassaq ataatsimeeqatigaa. Taannalu naapertorlugu oqaloqatigiinneq ingerlalluarpoq, Kommuneqarfik Sermersuumili kina borgmesterissatut tapersorniarnerlugu partiit allat qanoq aalajangersimanersut utaqqeqqaarlugu oqaatigerusuppaa.
KNR-imit borgmesterissatut unammillertoq Martha Abelsen Siumumeersoq oqaaseqartinniaraluaratsigu iluatsissinnaasimanngilarput.