Asii: Sermersooq puigorakku, Siverth?
Nuup qaanngiinnarneqarnera ilumoornerpa? Tamanna ilumuussappat isumassaqanngilluinnarpoq, Kommuneqarfik Sermersuumi borgmesteri, Asii Chemnitz Narup tusagassiorfinnut nalunaaruteqarluni taama aperivoq.
Ineqarnermut Naalakkersuisoq tusagassiortunik katersuutsitsivoq, ineqarnermullu tunngasuni suliassat saqqummiullugit. Inissianik nutarterisoqarnissaanut tunngatillugu Kommuneqarfik Sermersuumi pisariaqartitsisoqarnerpaajusoq erseqqissumik oqaatigineqarpoq, pisariaqartitsinerlu tunngavigalugu Naalakkersuisut sanaartortitsinissaq nutarterinissarlu isumaginiaraat.
Taamaakkaluartoq Kommuneqarfik Sermersooq qaangiinnarneqarpoq, inissianik assigiinngitsunik sanaartornissaq eqqartorneqalermat. Tamanna borgmesterimit eqqumiiginartinneqarpoq.
- Isumaqarpunga Ineqarnermut Naalakkersuisup kisitsisinik assigiinngitsunik tigussaasunik saqqummiussaqarnera eqqumiitsoq, qularutissaanngitsumillu Kommuneqarfik Sermersuumi nutarterisoqarnissaa erseqqilluinnartumik takuneqarsinnaasoq, taamaaseriarlunilu kommunini allani inissianik assigiinngitsunik sanaartortoqarnissaanik siunnersuuteqarpoq, Kommuneqarfik Sermersooq minillugu, Asii Chemnitz Narup oqarpoq.
Borgmesterillu eqqumiiginartitsinera tupinnanngilluinnarpoq. Tassami kisimi Sermersuumi nutarterisoqarnissaanik pisariaqartitsineq annertuvoq – kommunimilu inissarsiorlutik utaqqisut allattorsimaffiannut allatsissimasut amerlasoorujussuupput.
Kommunip nammineq inissiaatileqatigiiffiani Iserit A/S-imi maannakkorpiaq innuttaasut inissaminnik utaqqisut 2.039-nik amerlassuseqarput. Taakkunannga Nuup illoqarfianiinnaq utaqqisut 1.639-nik amerlassuseqarlutik. Tassunga innuttaasut amerlaqisut INI A/S-imut utaqqisunut allatsissimasut ilanngunneqassapput.
- Allatut oqaatigalugu, Kommuneqarfik Sermersuumi inissianik pisariaqartitsineq ernumanartorujussuuvoq, Ineqarnermullu Naalakkersuisup pisariaqartitsiffiusuni inissialiortitsisoqarnissaanik oqarnera naapertuutinngilaq, illua´tungaatigullu siunnersuutigalugu, Nuummi inissianik assigiinngitsunik sanaartortoqassanngitsoq. Neriuutigilluinnarpara tamanna puiguisoqarsimaneranik peqquteqartoq, Asii Chemnitz Narup oqarpoq ingerlaqqillunilu:
- Aammattaaq sammineqartariaqarpoq Kalaallit Nunaanni nunarsuarmiullu akornanni naliginnaasuummat nunaqarfinniit illoqarfinnut nuujorarneq. Tamanna isumaqarpoq inissanik Nuummi pisariaqartitsineq ullumikkumiit annertunerulerumaartoq. Tamanna aamma ilimanarpoq Tasiilami, kommunep Tunumi illoqarfik annersaat.
Taamatut oqaatigeriarlugu, ineqarnermut tunngasuni misissuisitsisoqarnissaanik pilersaaruteqartoqarnera borgmesterip naammagisimaarpaa, uani inoqutigiit isertitakinnerusut ineqarnerminnut akiliisinnaassuseqarnerat siunnersuusiorneqarnissaat.
- Kommuneqarfik Sermersuumi inissianik nutarterisoqarnissaanik sanaartortoqarnissaanillu pisariaqartitsinerup annertunerpaajunera misissuisitsinerup allanngortikkunnanngikkaa isumaqarpunga, kisiannili misissuisitsinerup naammassineqarnissaa tapersersorpara. Taamaattorli misissuisitsinerup aatsaat 2015-imi naammassineqarnissaa uggoraara, isumagami naapertorlugu pisortat inissiaataasa ullutsinnut naleqqussarnissaat peqqissutsimullu illersorneqarsinnaasumik pitsaassuseqartilernissaat arriisaarunneqartariaqanngimmata. Kaammattuutigissavara naapissasugut oqaluuseralugulu nutaanik sanaartorneq nutarsaanerlu qanoq pingaarnersiorneqassanersoq sumilu sanaartortoqassanersoq, Asii Chemnitz Narup taama naggasiivoq.
