Asii: Meeqqanut akilersuutit pillugit peqqussut allanngortariaqanngilaq

Qeqqata Kommuniani Kommune Kujallermilu borgmesterit Malik Berthelsen aamma Kiista P. Isaksen, isumqarput meeqqanut akilersuutinik akiliisinnaanngitsoqaraangat kommunit akiliussigallartarnerat peqqussutaajunnaartariaqartoq. 

Kommunit kattuffiata KANUKOKAp borgmesterit Siumumeersut taperserlugit aamma oqariartuuteqarpoq. 

Qaqqata Kommuniani Kommune Kujallermilu innuttaasut meeqqanut akilersuutinut katillugit 150 milliuunit koruunit sinnerlugit akiitsoqarput, tamannalu kommunit aningaasaqarnerannut artukkiisoq oqaatigineqarpoq. 

Aamma Koommuneqarfik Sermersuumi taamaappoq. Tassani innuttaasut meeqqanut akilersuuteqarnissamik pisussaaffimmik naammassinninngitsut 143 milliuunit koruuninik akiitsoqarput. Taamaakkaluartoq massakkut periuseq pitsaasuusoq Asii Chemnitz Narup isumqarpoq. 

- Angajoqqaat tamarmik meeqaminnik pilersuinissamut pisussaaffeqarnerat pitsaasuuvoq. Innuttaasulli pisussaaffimmik naammassinnissinnaanngikkaangata akiliigallartariaqartutut inissisimasoq ataasiinnaavoq, tassalu pisortat, borgemester Asii Chemnitz Narup KNR-imut oqarpoq.

Sermersuumi innuttaasut 140 milliuunit koruunit sinnerlugit akiitsoqarnerat kommunit artukkiisoq Naruppit oqaatigaa. Taamaakkaluartoq suliap meeqqat tungaanninngaanniit isigineqartariaqarnera oqaatigalugu. 

Akiitsoqartut akilissappata pisortat akiliititsiniartarnerat pitsaanerusariaqartoq Asii Chemnitz  Narup isumqarpoq. 

- Innuttaasut akiitsullit pisortanit akiliitinniarneqarnerat pitsaanerusariaqarpoq, Tamanna aaqqiivigineqartariaqarpoq ukiorpassuarnimi oqaluusereerparput, Inuit Ataqatigiinneersoq Asii Chemnitz Narup oqarpoq.

Namminersorlutik Oqartussat meeqqanut akilersuutinik akiliisinnaanngitsunik akiliussigallartarnissaa aamma oqaatigineqareerpoq. Tamannali isumatusaarnerunngitsoq Narup isumaqarpoq. 

Kommunit karsianit Nunattaluunniit karsianit akiliigaluarutta inuiaqatigiit aningaasaataa amerlinavianngillat. Taamaamma nukissakka oqallinnernut isumqarnerusunut atorusunneruakka, naggasiivoq.