Akilersuutit: Olsvigip kommunit itigartippai
Kommune Kujalleq Qeqqatalu Kommunia ullumi ataasinngornermi ersarissumik kajumissaaruteqarput: Innuttaasut aapparisimasaminnut assigisaanulluunniit akilersuutinik akiliinngitsoornerini kommunit akiliussisussaanerannik peqqussut Naalakkersuisunit atorunnaarseqquaat.
Taamatulli pisoqarnavianngitsoq, isumaginninnermut naalakkersuisup Sara Olsvigip oqaatigaa.
- Peqqussut atorunnaarsikkutsigu, meeqqat, anaanat ataatallu kisimiittut eqqugaassapput, naalakkersuisoq oqarpoq.
Kommunit marluusut aningaasartuutinut amerlasuunut akisussaaffimmik Inatsisartut Naalakkersuisullu tigusinissaannik ikioqqullutik noqqaassuteqartut kommunit kattuffiannit taperserneqarput.
Innuttaasut pisortanut akiitsorpassuinik akiliisitsiniarnermut periaasissamik nutaamik Naalakkersuisut sulissuteqartut Sara Olsvigip oqaatigaa.
- Innuttaasoq akiliisinnaanngippat, taava Naalakkersuisunit sulissutigerusupparput Ilanngaassiviup saniatigut qani,ut siunnersorneqarnissaa, aaqqissuussineq nutaaq Naalakkersuisunit siunnersuutigineqartoq innersuussutigalugu taama oqarpoq.
AAMMA ATUARUK KANUKOKA bakker Malik Berthelsen op
Ilanngaassivik atorlugu aaqqissuussinermi innuttaasut akissarsiaat pisortanilluunniit ikiorsiissutisiaat sulisitsisumit pisortanilluunniit Ilanngaassivimmut nuunneqassapput, taava akileraarutit aningaasartuutillu allat, soorlu akilersuutit ineqarnermullu akiliutit pisortanut akiliutigineqassapput, naggataatigullu aningaasat sinneruttut aningaaserivimmi kontumut nuunneqarlutik.
Sara Olsvigilli naalakkersuisullu Ilanngaassiviup piviusunngortinneqannginnerani peqqussut, kommuninut akilersuutinut akiliussisarnikkut koruuninik millionerpassuarnik aningaasartuuteqartitsisoq, atorunnaarsikkusunngilaat.
- Innuttaasut akilersuutinik akiligassaqartut eqqartuussivimmit akileeqquneqarlutik eqqartuunneqartarput. Taamaammat uagut imaaliallaannarluta aalajangiisinnaanngilagut anaanat ataatallu kisimiittut akilersuutinik tunineqartussanngortinneqartut akilersuutinik tunineqartarunnaassasut, Olsvig oqarpoq imalu nangilluni:
- Isumaginnittoqarfiit akisussaaffitsik nammassinnaasariaqarpaat. Kommunilli allaanerusunik aqqutissiuinissamut peqataarusuppata oqaloqatiginissaat peqataaffigerusupparput. Peqqussulli imaaliallaannarlugu peerneqarsinnaanngilaq, isumaginninnermut naalakkersuisoq, Sara Olsvig, taama oqarpoq.
AAMMA ATUARUK Kujallermi innuttaasut meeqqanut akilersuutinut millionilinnik aamma akiitsoqartut
AAMMA ATUARUK Inatsisartut iliuuseqartariaqarput
