Asii Chemnitz Narup Inatsisartunit tunuartoq

Asii Chemnitz Narup Inatsisartunit tunuartoq IA-p Facebookikkut nalunaarutigaa. Taama aalajangerneranut suna pissutaanersoq allassimanngilaq.

Allattoq Hanna Vestergaard Hviid

septembarip 23-at 2024 12:28

Nutserisoq Connie Fontain

Inatsisartut ataatsimiinnerisa tallimanngormat aallartinnerat annertuumik ajornartorsiuteqarfiunngilaq. Ataatsimiinnerilli ulluisa aappaat pisoqarfiuvoq.

Asii Chemnitz Narup Inuit Ataqatigiinneersoq Inatsisartunit tunuarpoq. Partii Facebookikkut taama nalunaaruteqarpoq.

Taanna Inatsisartunut siullermik 1999-imi qinigaavoq, 2021-milu aningaasaqarnermut nunamullu imminermut naalakkersuisunngorluni. Taannali Nakkutilliisut taassuma Kommuneqarfik Sermersuumi borgmesteriunerata nalaani pisunik isornartorsiuereersullu 2021-mi novembarimi naalakkersuisutut tunuarpoq.

Asii Chemnitz Narup Kommuneqarfik Sermersuumi 2009-mit 2019-imut borgmesteriuvoq.

Aamma atuarukAsii Chemnitz Narup aningaasaqarnermut naalakkersuisutut tunuarpoq

Taassuma kingusinnerpaamik 2025-mi apriilip arfernani qinersisoqarnissaa sioqqullugu tunuarneranut suna pissutaanersoq, IA-p allagaani allassimanngilaq.

- Asii ilaqutaalu tamanik ajunngitsumik kissaappagut, partii Facebookimi allappoq.

KNR-ip Asii Chemnitz Narup aamma IA oqaaseqartinniarsarai.

Harald Bianco Tasiilameersoq (aamma IA) Inatsisartunit tallimanngormat aamma tunuarpoq. Tassungalu taarsiullugu Edvard Nielsen Aronsen sinniisussatut iserluni.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.