Asiamit nunatsinnut suliartortorpassuit
Filippinerit 81-it, thailandimiullu 39-t, kiattup seqerna qimaannarlugu arsarneqartartumut januaarimi 2011-miit nuussimasut, Avisen.dk-mi allaaserineqarpoq.
Nunanit allanit nunasiniartunut allaffeqarfimmit kisitsisit takutippaat, nunanit Asiameersunit taakkunannga marlunnit amerlanerpaat Kalaallit Nunaanni sulinissamut akuersissummik piniartartut.
- Nunaqavissut ilinniagaqarsimanngitsut suliffissaaleqisut amerlaqimmata, nunanit allaneersut sulisorineqartarnerat taama annertutigimmat annernaqaaq eqqarsarnarlunilu, Sulinermik Inuussutissarsiuteqartut Kattuffianni, SIK-mi, siulittaasoq, Jess G. Berthelsen, Avisen.dk-mut oqarpoq.
Akunnittarfinniunerusoq neriniartarfinnilu, Asiameersut sulisorineqartartarput. Soorlu Nuummi Hotel Hans Egedemi eqqiaasartut 60 procentii Asiap kujataani-kangisissuaneerput.
Jørgen Pedersen, Nuummi neriniartarfinni cafénilu 100-t missaannik sulisitsisuusoq, oqarpoq, Nuummi sulisussarsiorneq ajornakusooqisoq, naak taamaaliorusunnaraluartoq.
- Avataaniit sulisoqarneq akisoorujussuuvoq. Kalaallinik sulisoqarsinnaasuugutta 1½ millionit koruunit ukiumut sipaarsinnaagaluarpakka, Jørgen Pedersen Avisen.dk-mut oqarpoq.
SIK-mit ilisimatitsissutit naapertorlugit nunanit allaneersut isumaqatigiissutit malillugit akissarsiaqartinneqartarput, naak isumaqatigiissutit malillugit sulinngikkaluarlutik.