Aserorterineq immami sillimaniarnermut aarlerinartoqalersitsivoq
Telemi sulisut attaveqaatinut nassitsissutit illuaqqat ilaannut Maniitsup eqqaaniittumut misissuiartornerminni tikitaq kusanarpallaanngitsoq naammattoorpaat. Nassitsissummik illuaqqamilu tikitami aserorterisimanerup sumiiffik ilisarnarunnaartivissimavaa.
-Ilimanarluinnarpoq inuusuttut aasami atuanngiffeqarnermi susassaaleqinerup pianik taama aserorterisimanissaat. Suliassarli politiit misissuiffigalugu paasiniaaffigissavaat, neriuppungalu aserorterisimasut nassaarineqarumaartut, Carl Johan Colberg Telemit sineriammi pisortaasoq taama oqarpoq.
Maniitsup eqqaani aserorteriffigineqartup assinginik 100-t sinneqartunik sinerissami Tele nassitsiveqarpoq. Atortullu akisuut aserorterneqartarsimanngikkaluartut taamaattoq Maniitsup eqqaani taama pisoqarpoq.
-Aserorterinerup kingorna aningaasartuutissat qanoq amerlatigissaneri oqaatigiuminaappoq, teknikkerittalu aserorterneqartut iluarsaassinnaaneraat apeqqutaalluinnarpoq. Iluarsineqarsinnaassanngippatali akisoorujussuanngorsinnaavoq, nassitsissummi ataaseq millioni koruunit sinnerlugit akeqarpoq, illuaqqamilu taamaattut marluupput, Carl Johan Colberg marlunngornerup ullaatungaani oqaloqatigineqarnermini taama oqarpoq.
Aningaasartuutaasinnaasussalli tassaanngillat pisup kingorna ajornerpaat. Immamimi angallanneq maanna navianartorsiortsinneqariaannaavoq.
-Neriuutiginngilluinnarpara aserorterisimasut immami angallanerup navianartorsiortsinneqalernera ilisimagaat. Angallamimmi kilisaammilluunniit ajutoortoqaleraluarpat, aserorterinerullu kingunerisaanik Aasiaat Radioanut attaveqarsinnaanngikkunik taava tamanna inuup inuuneranik akeqarsinnaassaaq, Carl Johan Colberg oqaluttuarpoq.