Asasarput siunissaq...

ASASARPUT SIUNISSAQ

Asasagut Naalakkersuisut Inatsisartullu

Kalaallit Nunaanni meeraasugut aaku ataani allaqqasut suliniutigineqarnissaannut kissaatigut.

1. Ilinniartitaaneq

- Naalakkersuisut sipaarniarfigissanngilaatigut tapersersussavaatigut ilinniartitaaneq pillugu.        

- Atuarfiit salliutillugit nutarternissaat aningaasaliiffigisariaqarpoq, aserfallannikut oqunnikullu peqqinnissamut ajoqutaammata. Eqqaamasariaqarpoq atuarfiit meeqqat suliffigimmasigit.                        

- Meeqqat atuarfianni atualernermiilli imminut tatigaluni sassarsinnaaneq ilinniartitsissutiginerusariaqarpoq, taamaalilluni inuunermi ittoorneq tunuarsimaarneq pingineerukkiartorneqarnerussammat. Assersuutigalugu ilinniartitsissutini meeraq namminersorluni saqqummiisinneqarnermik misiliitinneqartarlunilu ilinniartinneqartassasoq, pingiliunnissaa tikillugu. Immitsinnut tatiginerussaagut siunissami ajunngitsumik angusaqarniarutta.

- Namminersuleriartorneq ilutigalugu meeqqat atuarfianni tuluttut oqaatsinik ilinniartitsineq annertusarneqarlunilu pitsanngorsarneqartariaqarpoq, nunanut allanut attaveqarnerup annertusiartornera pissutigalugu. Tuluit oqaasii qallunaat oqaasiiniit pingaartinneqarnerusariaqarput.               

- Meeqqat soqutigisaminnik ilinniarfissaqarsinnaanissaat periarfissinneqartariaqarpoq. Assersuutigalugu; Qitinnermik ilinniarfik, nipilersornermik ilinniarfik, timersuutit assigiinngitsut (isikkamik arsarnerinnaanngitsoq). , Illoqarfinni anginerusuni naluttarfiit, filmertarfiit assigisaallu pilersitisoqartariaqarpoq.

- Angajoqqaatik qimallugit illoqarfinnut atuariartortartut, ilinniartut inaanni najugallit ilinniarsimasunik sullinneqarnerusariaqarput. Pissutigalugu perorsaariaaseq qangatoortoq ullutsinnut naleqqukkunnaarnikoq atorneqarpallaarmat; inerteriinnarneq, siunnersuinani ikorfartuinanilu. Meeqqat inuusuttuaqqallu ulluinnarni atuarfimminni, ilinniartulluunniit inaanni inatsisinut oqartussaaqataanerat annerusariaqarpoq.         

2. Sunngiffik

- Meeqqat sunngiffimmi sammisassaat soorlu ornittakkat, timersortarfiit, allallu sunngiffimmi sammisassat sipaarniarfigineqartarnerat akuerisinnaanngilarput. Assersuutigalugu aasami meeqqat atuanngiffeqarnerini sammisassat matoqqatinneqartarput, taamaasillutik ajortunik misileraanissaannut qaninnerulertarlutik.

- Meeqqanut inuusuttuaqqanullu kalaallisut radio-kkut tv-kkullu aallakaatitassiat annikillisaaffigineqartariaqanngillat, meeqqat pisariaqartimmassuk nuannarisaminnik tusarnaarlutillu isiginnaarsinnaanissartik.

3. Atornerlunneqarneq

- Meeraq atornerlunneqarsimatillugu pingaartuuvoq pisortaninngaanniik piaartumik meeqqap ikiorserneqarnissaa. Meeqqamut pingaarpoq politiit kommunilu piaartumik ikiuigasuarnissaat. Suliamik ingerlatsisup piaartumik suliaq suliarissavaa, meeqqamut toqqissisimaneq pingaartillugu. Meeraq atornerlunneqarsimatillugu meeqqamut ikiorsiineq pimaarunneqartarpallaaqaaq.

4. Kaanneq

- Meeqqat kaattarnerat pinngitsoortinneqartariaqarpoq. Angajoqqaat pissakinnerit suliffissaaleqisullu meeraat ikiorneqarnerusariaqarput. Assersuutigalugu aalisartut meeraat aalisarnerup killilersugaanera aallaavigalugu amingaateqartinneqalertarput, taamaasilluni aamma meeqqap amingaateqarnermini pinerlulluni tillinniartalernissaa qaninnerulersarluni.

5. Susassaqarneq

- Illoqarfiit nunaqarfiillu assigiimmik susassaqartitsinikkut peqartinneqartariaqarput. 

Meeqqat inuusuttullu timikkut tarnikkullu peqqissuusariaqarput imminnut tatiginiarunik.

Meeqqat sinnattoqarsinnaatitaapput killilersorneqaratik.

Neriorsuutit piviusunngortinnerusariaqarput.

Asasagut Angajoqqaat Inersimasullu

Kalaallit Nunaani meeraasugut aaku ataani allassimasut neriuutigut.

- Pingaaruteqartorujussuuvoq aallaqqaammulli kingusinaalinnginnermi meeqqat inuusuttullu ilinniagaqarnerup pingaaruteqassusianik nassuiaanneqartarnissaat, atuarnerullu pingaaruteqassusianik ilisimatinneqartarnissaat. Pingaaruteqarportaaq angajoqqaat ilisimassagaat meeqqat atuarneranni tapersersuilluassallutik, qiimmassaanikkut ilinniagassaannik atuarfiullu paarinissaanut tapersersuinikkut. Inuusuttut siunissaqarluassappata pingaaruteqarpoq ilinniakkamik naammassinnissimaneq. Angajoqqaat akisussaaffimmik tigusinermikkut meeqqamik siunissaqarluarnissaannut siuttuussapput. Angajoqqaat meeqqaminnut toqqissisimasumik inuuneqartitsisariaqarput.

- Tulluanngilaq angajoqqaat akueriinnassagaat meeqqatik mikinerit pujortartalersimappata, imertalersimassappata allanilluunniit aanngajaarniutinik atuisalersimassappata. Pingaartuuvoq angajoqqaat meeqqatik ilisimatittuassagaat akuleruffiginerisigut, pujortartarnerup, imertarnerup aammalu aanngajaarniutinik atuisarnerup peqqinnannginneranik oqaluttuuttarnerisigut, immaqalu ilisimatillugit pujortartassanngitsut, imertassassanngitsut allanilluunniit aanngajaarniutinik atuisassanngitsut. Meeqqat inuusuttullu paasissutissanik ilisimatinneqartarput atuarfimminni ilinniartitsisuniik, pujortartarneq, imertarneq aamma aanngajaarniutinik atuisarneq peqqinnanngitsuusoq. Angajoqqaalli aamma akisussaaffigivaat, meeqqaminnut oqaloqatigiissutigissallugu pujortartarnerup, imertarnerup aanngajaarniutinillu atuisarnerup peqqinnanngitsuunera. Innersuutigissavarput meeqqanut sullissisut sulinerminni pujortanngiivittarnissaat.

Inersimasut meeqqanut paasinnittarnissaat pisariaqarnerpaavoq.

Kalaallit Nunaanni meeraasugut aaku ataani neriorsuutigiumasagut

- Meeraasugut nammineq akisussaaqataavugut atuarfimmi malinnaalluassalluta.

- Periarfissaqarpugut nunanut allanut atuariartorsinnaatitaalluta, pisariaqartipparpulli allamiut oqaasiinik ilinniarluarnissarput.

- Imminut tatiginerulissalluta sassarsinnaalernerussagatta isummagullu annissuullugit, ittoorunnaarluta immaqaluunniit kukkunissarput ersigiunnaarlugu. Pisariaqarpoq nuannarinngisatsinnik iliuutsit naameersinnaanissai.

- Pisariaqartipparput immitsinnut oqaloqatigiilluarsinnaalernissarput, nalunnginnatsigu qinngasaarisartut qinngasaarinerminnut pissutigisaraat angerlarsimaffimminni ajornartorsiuteqarnertik. Oqaloqatigiilluta qinngasaaruttarneq unitsissinnaagutsigu meeqqat tamarmik atuarfimmi sunngiffimmilu nuannaarnerulissapput.

- Ilinniarnermut tunngasumik akisussaaqataasariaqarpugut, eqqarsaatigalugulu inuunerput qanoq atorusunnerlugu. Paasissutissanik internetsikkut allatigulluunniit periarfissatsinnik ujaasisinnaavugut. 

Asannittumik inuulluaqqusilluta

Kalaallit Nunaata meerartai