Asanninnermut tusariarlinngooq

- Aliikkusersuinissarput qulequtsersimavarput ”asanninneq”, isiginnaartitsinertigut, erinarsornertigut, qilaasersornertigut allatigullu takutissagatsigu tusartillugulu. Soorunami kalattut qitinnernik aamma tissinartunik takutitassiaaqqanik ilaqassooq, taamaattummik isiginnaariartussat qilanaarutissaqarluarput, aliikkusersuinissanut ataqatigiissaarisut ilaat Tukummeq Egede Martensen aamma Ane Berthelsen oqarput.

Siusinnerusukkut misilittakkat naapertorlugit isiginnaariat ilarpassui inissaarullutik angerlaannartarsimapput. Tamanna ilaatigut pinngitsortinniarlugu NAIP-ip siulersuisuisa aalajangersimavaat sisamanngornermi unnukkut generalprøveqarnissami utoqqalinersiutillit aamma siusinaarlutik soraarnerussutisisartut qaaqquneqassasut.

-  Utoqqalinersiutillit tikilluaqqussaapput, utoqqalinersiuteqarnermut allagartaq nassaannassavaat, taava isilernermi NAIP-ip siulittaasuanit tikilluaqquneqassapput, NAIP tusagassiutinut nalunaarummini ilaatigut taama allappoq.

Meeqqat inuusuttuaqqallu isiginnaartitseqataasalernissaat ukiormanna aamma annertuumik sulissutigineqarpoq.

- malinnaaffigalugit assut nuannerpoq qitinnermut qilaasersornermullu ineriartorluarnerat takuneqarluarsinnaagami. Meerartavut aamma qilanaaqaat Katuami inersimasunik takutitseqarteqarnissaminnut, aaqqissuisut oqarput.

NAIP-p aliikkusersuinera Katuami tallimanngorpat pissaaq.