Arsaattarfiliornissat Siumup Demokraatillu isumaqatigiissutigaat

Demokraatit Siumumit taamaallaat taperserneqarlutik siunnersuutertik akuersissutigiteqqarpat, Naalakkersuisut, IA Atassullu naaggaartut.

- Apeqquserneqarsinnaavoq, inuiaqatigiit aningaasaataat killeqartut illoqarfinnut anginerinnarnut ineriartortitsinermut atorneqassanersut, IA-p oqaaseqartartua Aqqaluaq B. Egede oqarpoq.

Naak isikkamik arsaanneq peqqinnartuusoq, taamaalillunilu arsamik pinnguarneq peqqinnissamut siuarsaataasoq, partiip ataasiinnaalluunniit akerlerisinnaanngikkaluaraa, Demokraatineersup Niels Thomsenip siunnersuutaa amerlanerussuteqaqqartunit akuerineqarpoq.

Siunnersuutaavoq, ivigaasanik qallikkanik pingasunik sananissamut pilersaarusiornissaq aappaagumut aningaasanut inatsimmi ilanngunneqassasoq.

Demokraatit IA-lu Naalakkersuisoqatigiinni qajaqatigiittaraluartut, Siumup taaseqataaneratigut amerlanerussutissat iluatsinneqarput.

IA-mi naliliineq naapertorlugu tassa Ilulissani, Sisimiuni, Nuummilu innutaasut kisimik iluaqutissaannik aningaasaliinissaq inuiaqatigiit sinnerinut naapertuutinngilaq. Demokraatinili isumaqarput, illoqarfiit minnerit nunaqarfiillu mininneqarnissaat pineqanngitsoq, arlanniilli allartittoqartariaqartoq.

- Una alloriarneq siulliuvoq. Illoqarfiit najugaqarfiillu allat timersornikkut periarfissatigut inerisaaffiginissaat ammaffigisorujussuuarput. Tassa siunnersuutip uuma angerneratigut allat naameerneqanngillat, Niels Thomsen oqarpoq.

Kisianni IA-mi tassa isumaqarput, Demokraatit kukkusumiit aallartittut. Tassami inuiaqatigiit tamarmik timersornissamut periarfissaat isiginiarneqartariaqartut, Aqqaluaq B. Egede, tunngavilersuivoq:

- Aallartiffeqarsinnaangillat illoqarfinni anginerusumi arsaattarfiliornikkut. Sumiiffinni periarfissat nalilersorneqartariaqarput. Aamma nunaqarfimmiut ilaat uatsinnut allagaqarput timersornikkut periarfissatik qanoq ajortigisut oqaatigalugit.

Qaqortumi ivigaasanik qallikkamik arsaattarfeqareerpoq.