Arnat utaqqisinneqaqqittussanngorput
Maanna paasinarsivoq arnani inersimasuni panamerikamiut 2013-mi pissartanngorniunneranni kalaallit arnartaat peqataasussaajunnaartut. Siunniussaq ukiunik qulinik pisoqaassusilik uteqqinneqarpoq. Inuusuttut inerisarneqassapput siunissaq ungasinnerusoq isigalugu inersimasuni unammisartut sakkortunerit anguniarlugit.
2001-mi Italiami arnat VM-qarnerisa kingorna assammik arsartartut kattuffiat aalajangerpoq inuusuttut salliutillugit arnani suliniarniarluni. Taamani nunanut allanut unammisartut sungiusaasuat Preben Clausen inuusuttorpaalussuarnik nunanut allanut unammisartunik toqqaavoq. Taakku makussarlugit inuusuttuni panamerikamiut pissartanngorniunnerini arlalinni peqataapput. Tassani siunertaavoq inersimasuni VM-mut anngunniuttalernissamut piginnaanngorsarnissaat.
U-20-ni nunanut allanut unammisartut 2010-mi Sydkoreami VM-qarneranut anngupput maannalu taakku inersimasunngorput.
Taamaattoq siunnerfimmik ukiunik qulinik pisoqaassusilimmik arnat nalunaarfigineqaqqipput. Arnat panamerikamiut pissartanngorniunneranni peqataanissamut ilimasutsitaaleraluarsimasut pakatsisinneqarput. Panamerikamiut pissartanngorniunneranni Chilemi peqataanissaq 800.000 koruuninik akeqartussatut tagginneqaraluarpoq.
- Taakku 800.000 koruunit atorluarnerussapput sungiusanernut Kalaallit Nunaannilu najugalinnut sungiusartitsinernut amerlanernut atoraanni, Elise Bruun GHFip siulersuisuiniit KNR.gl-mut oqarpoq.
GHF-mi siulersuisut angutit nunanut allanut unammisartut sungiusaasuat Niels Møller suleqatigalugu aalajangerput arnani angutinilu inuusuttunut sammisitamik sungiusarnerunissaq aallunneqassasoq.
GHF-mi siulersuisut kingullermik ileqquusumik ataatsimeersuarnermi nalunaaraluarput arnat inersimasut VM-mut atatillugu unammisaleqqissasut. Kisianni tamanna 2013-mi panamerikamiut pissartanngorniunneranni pinavianngitsoq GHF maanna nalunaarpoq.
