Arnat marluk hashimik anngiortumik eqqusseriaraluartutut erngertumik pineqaatissinneqartut
Arnat marluk ikiaroornartumik hashimik nunatsinnut anngiortumik eqqusseriaraluarnertik pissutigalugu arfininngormat ualikkut tigusaapput.
Arnat marluk taakkua, aappaa qaammatini arfineq-pingasuni aappaalu qaammatini qulini, pineqaatissinneqarsimasunut inissiisarfimmiittussanngortinneqartut, Kalaallit Nunaanni politiit ataasinngornermut pigaartuisa pisortaat Malik Olesen oqarpoq.
Ilanngaaserisut hashimik nunatsinnut anngiortumik eqqusseriaraluartumik unitsitsisimallutik politiinut arfininngormat ullup qeqqanut qiteqquteqqammertoq nalunaaruteqarput, tamatumalu kingunitsiannguagut assinganik nalunaaruteqaqqillutik.
- Unitsitaaqqaartoq hashimik 2 kiilungajalluinnarmik nassataqartoq paasinarsimmat tigusarineqarpoq, unitsitaasullu aappaa 2,4 kiilumik nassataqartoq aamma paasinarsimmat aamma tigusarineqarpoq, Kalaallit Nunaanni Politiit sapaammut pigaartuisa pisortaat Jørgen Madsen KNR-imut sapaatiummat.
Pineqaatissinneqaataat kisimi tullinnguuttoq
Arnaq hashimik 2 kiilungajalluinnarmik nunatsinnut anngiortumik eqqusseriaraluartutut tigusarineqartoq qaammatini arfineq-pingasuni inissiisarfimmiittussanngortinneqarluni ataasinngornermi pineqaatissinneqartoq aappaalu qaammatini qulini pineqaatissinneqartoq, Malik Olesen ullaaq manna oqarpoq.
- Suliaq taanna naammassivarput, arnammi taakkua pineqaatissinneqareermata, Malik Olesen oqarpoq.
Arnat taakkua marluk timmisartorsuarmut arfininngornermi tikittumut ilaasuusut imminnut atassuteqanngillat. Taamaammat anngiortumik eqqusseriarluarnermut suleqatigiissimassangatinneqanngillat.
