Arnat marluk arpaaserlutik sermersuaq itivinnialikkersaaraat

Arpaaserluni taama arnani sermersuarmik suli itiviisoqarsimanngisaannarpoq, allaammi angutini nunarsuarmioqatitsinni suli tamanna uppernarsaaserlugu anguneqanngilaq. Tassa Guiness Book of World Records-imi suli tamanna ilanngunneqanngilaq.

Arpannissamik pilersaaruteqartup aappaa Nivi Geislerimik ateqarpoq, taanna siornatigut Ironmaninngorniuttoqarmat peqataareerpoq, timersuullu taanna timersuutini tamani sakkortunerpaanut ilaavoq.   Nivi Geislerip Louise Petersen arpaqatigissavaa. Arpaqatissaatalu qanoq isumassarsiamik sunnersimanerinni ima oqaluttuaraa: - Pilersaarut aallartippoq, Louisep isumassarsiarigamiuk. Arpallunga naapillugu aperigaminga soqutiginninnersunga taamaaliornissamut. Taava tassami nangaarianngiivillunga imaappunga: soormi? Misilinngikkukku paasinavianngilara. Nivi Geislerip qanoq peqataanissamut kajumitsassimanini taama oqaluttuaraa.

 Arpaffissaq 600 km-rit missaanink isorartussuseqarpoq. Allanik taama angusaqartoqarsimanersoq aperiganni ima akivoq: - Tusarparput angut ataaseq arpannikuusimasoq, kisianni allanneqarnikuunngilaq. Nivi Geislerip aamma Louise Petersenip anguniagaat Guiness Book of World Recordsini - tassa nunarsuarmioqatitsinni nallerneqanngisaannartumik angusaqartut allattorsimaffianni - suli ilanngunneqanngilkkaluartoq, siornatigut angut misileereersimasoq Nivi Geislerip oqaatigaa. Nangilluni anguniagaq imaannaanngitsoq ima oqaluttuaraa: - Anguniagaq annertoorujussuuvoq, aamma ulluinnarni inuinnarnit anguniarneqarneq ajorpoq. Naliginnaasumik sisoraatinik itivinneqartarami. Taamaammat allanngortilaarlugu aamma pikkunarnerussagami. Arpannerlu uagut sungiusimanerullutigu. Taama iliortoqarnikuunngisaannarpoq, taamaammat uagut arnani siullersaalluta uppernarsissavarput soorlu taama iliortoqarsinnaavoq. Aningaasaliisussanik ujartuineq Nivi Geisler sermersuarmik arpaasiinnaqarluni itiviinissamik arpattartoqatini peqatigalugu tunaartaqartup, aningaasaliisussanik ujartuisoqaleruttortoqarnera ilanngullugu oqaatigaa. Arpanissamut aningaasaliisut naammatsippata Kangerlussuarmiit Isortumut arnat marluk arpassapput, qaammatillu ataatsip missaanik sivisutigisumik anguniagaq anguniarneqassaaq.