Naalakkersuisut siulittaasuat, Jens-Frederik Nielsen (D), aamma inatsisit atuutsinneqarnerannut naalakkersuisoq, Mariane Paviasen Jensen (IA) tusagassiortunik tallimanngornermi katersortitsimmata pissutsit ilungersunartut malugineqarsinnaalluarput.

Nalunaarusiat marluk pineqarput. Nalunaarusiani nakorsat kalaallinik arnanik meeqqanillu akuersititseqqaarnatik 1960-ikkunnit 1992 tikillugu naartunaveersaasersuineranni Danmark inuiannik nungusaasimanersoq ilaatigut misissorneqarpoq.

Suliarli arnanut ullumikkut suli inuusuttunut kingunerlutsitsingaatsiarfiusumik misigisaqarsimasunut aamma tunngassuteqarpoq.

- Erseqqissaatigissavara sammisaq pingaartumik inunnut ilaqutariinnullu eqqugaasimasunut sakkortummat, Jens-Frederik Nielsen tusagassiortunik tallimanngornermi katersortitsinermi oqarpoq:

- Oqaloqateqarnissamut pisariaqartitsisoqaruni Inulerivik 80 11 90-mut attavigineqarsinnaavoq.

Arnat eqqugaasimasut ilaat, Jensine Frederiksen Kreutzmann 86-inik ullumikkut ukioqarpoq.

Taassuma nalunaarusiat nutaat marluk tusagassiortunik katersortitsinermi saqqummiunneqarnerat Maniitsumi angerlarsimaffimminit malinnaaffigisinnaagamiuk attortisimavoq:

- Ullumikkut assorsuaq pitsaavunga. Aamma pikkunartorsiorpunga soorunami. Kisianni ajunngilanga, Jensine Frederiksen Kreutzmann oqarpoq.

Siullermik qullilineq kingornali nuannaarneq

Jensine Frederiksen Kreutzmann Aasianni 1969-imi ilinniartuulluni ilisimatinneqarani naartunaveersaaserneqarpoq.

- Sooq uanga, sulilluarnikooqalunga napparsimavimmi. Inortuissanangalu sulilluarnikooqalungalu. Sooq uanga taamaattulerneqarpunga?, taassuma misigissutsit eqqarsaatigisartakkani oqaatigai.

Jensinep akuersitinneqarani naartunaveersaaserneqarsimanini ukiorpassuarni oqaluuserisimanngilaa. Taamaammat maannakkut ammasumik oqaluuserineqarnera nuannaarutigaa.

- Qujanartumillu aamma oqaluuserineqalerami. Qujanarpoq, qujasorujussuuvunga taamatut pissusilersormata, Jensine Frederiksen Kreutzmann oqarpoq.

Taassuma spiralilersuineq pillugu nalunaarusiat ullumikkut saqqummiunneqartussat ippassaq tusaramigit misigissutsikkut attortingaatsiarpoq.

- Misigilerpunga qulliikka kuuinnaavittut uffa qianangaluunniit. Allatut ajornaqimmat qiaqqaarlunga nuannaalerpunga, Jensine Frederiksen Kreutzmann oqarpoq.

Kingunerluutinik uteqqiisitsisoq

Spiralilersuinermi eqqugaasimasut sinnerlugit akuersitinneqarani spiralilerneqarsimanermik oqaluttuaqqaartuusoq, Naja Lyberth spiralilersugaasimasuni aqutsisoqatigiit peqatigalugit Facebookikkut allagaqarpoq. Taassuma nalunaarusiat nutaat oqaaseqarfigerusunnagit tassani allappaat.

- Arnat spiralilersorneqarsimasut piumasarinngisaminnik aqutsisoqatigiinniit matumuuna nalunaarutigissavarput FN’p inuit pisinnaatitaaffii pillugit isumaqatigiissutaat tunaartaralugu Naalakkersuisut qulaajaatitsinermut piginnittuummata. Uagutsinniinnanili eqqugaasuni suliniuteqarsimasuniinnani, arnat arfinillit facebookikkut allapput.

Taassuma inuiannik nungusaaneq pillugu apeqqut ilungersunarluinnarmat arnanullu eqqugaasimasunut kingunerluutinik utersaartitsissutaasinnaanera oqaatigaat.

- Erseqqissaatigissavarpulli ullumikkut Qallunaat Nunaanni naalagaaffik aamma ullumikkut Nunatsinni Naalakkersuisut pisuunngimmata uagutsinnut iliuuserineqarsimasut pillugit, taakku facebookikkut allapput:

- Kisiannili massakkut qallunaat naalagaaffiat Naalakkersuisullu akisussaaffitsik tigullugu iliuuseqarput utoqqatsernikkut taarsiiffigitinnissamillu qulakkeerinninnikkut. 

Politikkikkut sakkugineqassanngitsoq

Naalakkersuisut Danmark peqatigalugu ilaatigut spiralilersuisoqarneranik misissuisussamik saammaateqatigiinnissamut isumalioqatigiissitaliortoqarnissaanik pingaartitsillutik tusagassiortunik tallimanngornermi katersortitsinermi oqaatigaat.

Suliarli politikikkut sakkugineqassanngitsoq oqaatigaa:

- Tamatuma saniatigut arnat eqqugaasimasut sammisat politikkikkut sakkutut atorneqannginnissaa qinnutigigaat oqaatigerusuppara, Jens-Frederik Nielsen oqarpoq.

Folketingip inatsit arnanut naartunaveersaasersuinermi eqqugaasimasunut 300.000 koruuninik taarsiissuteqarnissamut periarfissiisoq sisamanngornermi akueraa.

- Nuannaarutigaarput massakkut naalagaaffik aamma nunatsinni Naalakkersuisut iliuuseqarmata utoqqatsernikkut aammalu ajunngitsorsiassanik sinaakkusersuinikkut suliaqarlutik, arnat eqqugaasimasut aqutsisoqatigiivi facebookikkut allapput:

- Tassa kinguaatta uagutsituulli misigisaqanngisaannarnissaat qulakkeerusukkatsigu. Inuiattut ingerlaqqittussaaniassagatta naammattunik kinguaaqarsinnaaniassagatta inuiaqatigiinnik ingerlatitseqqiisussanik.