Adjunkti: Arnat atugarisaat pingaartinneqanngippallaarput

Arnat akissarsiakinnerunerat arnanut appasinnerusumik isiginneriaaseqarnermut takussutissaasoq, inuiaqatigiilerinermi adjunkti isumaqarpoq.
Assi © : KNR
novembarip 03-at 2017 15:55

Arnat angutininngaanniit akissarsiaat agguaqatigiisillugit 80.000 koruuninik ikinnerusut, Naatsorsueqqissaartarfiup kisitsisaataasa takutippaat.

Tamanna arnanut appasinnerusumik isiginneriaaseqarnermut takussutissaasoq, inuiaqatigiilerinermi adjunkti isumaqarpoq.

AAMMA ATUARUK Arnat angutinit isertitakinneroqaat

- Isumaqarluinnarpunga arnanut appasinnerusumik isiginneriaaseqarnermut takussutissaasoq, Marie Kathrine Poppel, inuiaqatigiilerinermi adjunktiusoq oqarpoq. 

Arnat atugarisaat pingaartinneqanngippallaartut, taanna naliliivoq:

- Taakkua politikerininngaanniit isiginiarneqarluaraluarlutik kisianni sulisui arnaanerusartut atugarisaat, soorlu akissarsianut tunngasinnaapput, ilinniaqqinnissamut pikkorissarnernullu tunngasinnaapput, taakkua pingaartinneqanngippallaaqaat, adjunkti KNR-imut oqarpoq. 

Perorsaasut atugarisaat nalilernikippallaartut

Perorsaasut suliaat suliallu arnanit suliarineqakkajuttut allat inuiaqatigiinni nalilernikippallaarneqartartut, Poppel isumaqarpoq. 

Taakkua atugaat isiginiarneqarnerusariaqaraluarput, soorlu meeqqat, inuusuttuaqqallu atugaat maanna isiginiarneqaqisut, Poppel isumaqarpoq.

- Kisianni aamma pingaarluinnarpoq sulisut aamma taamatut eqqartorneqarnissaat, taakku atugarisaat qanoq ittuussappat? 

Marie Kathrine Poppel taama nassuiaavoq. 

Arnat angutillu isertitaasa assigiinnginnerat inuiaqatigiinnut oqallisissiariniarlugu, Naligiissitaanermut Siunnersuisoqatigiiffik KNR-imut oqarpoq:

- Misissorusupparput aammalu oqaluusererusupparput oqallissaarutigerusullugulu taava qanoriliussuugut sumiuna putoqartoq imaluunniit sumiuna iliuuseqartussaagaluartugut? 

Naligiissitaanermut Siunnersuisoqatigiinni siulittaasoq Elisa Petersen KNR-imut taama oqarpoq.