Arnat allannguiniarlutik ilungersuussisut Talibanit paarsisuilu aporaattut
Eqimattaq afghanistanimiut arnartaannik inuttalik, Talibanit nunami aqutsisuulernerannut akerliullutik, Afghanistami illoqarfiit pingaarnersaanni Kabulimi, arfininngornermi takutitsipput.
Taakkua naligiissitaaneq arnallu nunami naalakkersuisussani inissaqarnissaat pillugit akerliussutsimik takutitsipput.
CNN taama allaaserisaqarpoq.
Arnat allannguiniarlutik ilungersuussisut, sapaatit akunnerata ingerlanerani ikinnerpaamik pingasoriarlutik Afghanistanimi akerliussutsimik takutitsipput.
AAMMA ATUARUK Afghanistanimi eqqissineqarnissaa pillugu Nuummi malunnartitsiniaasoqartoq
Afghanistanimi nutaarsiassaqartitsiviup, Tolo-p, Talibanit paarsisuisa arnallu arlallit aporaannerat arfininngornermi takutippaa.
Akerliussutsimik takutitsineq persuttaasoqalerneranik kinguneqarpoq. Talibanit paarsisuisa arnat præsidenteqarfiliarniarsarisut akornusersulermatigit. Tassani akerliussutsimik takutitsisunut gassi qulliliornartoq atorneqarpoq.
AAMMA ATUARUK Amerikamiut sakkutuui kingulliit Afghanistanimit qimagupput
Allannguiniarluni ilungersuussisup, Nargis Sadat-ip niaqua akerliussutsimik takutitsinermi aarnaartoq videokkut immiunneqarpoq, inoqatinullu attaveqaatini siammarterneqarluni.
Taassuma Talibaninit akerliussutsimik takutitsinermi saassunneqarsimanini oqaatigaa.
Talibanit naalakkersuisussat pillugit suli isumaqatigiinniarput, arnanilli naalakkersuisoqassanngitsoq ilimasaarereeput.