Arnat affaasa inuunermi ilaanni persuttaaneq qanimut misigisimavaat

Nakuuserneq unitsinniarlugu inuiaqatigiinni oqaloqatigiinneq ilinniartariaqartoq, Maliina Abelsen oqarpoq.

Nunatsinni arnat affaasa inuunerminni nakuuserneq qanimut misigisarpaat. Tamattalu oqaloqatigiinneq ilinniartariaqarparput. Angutaalluartoq tassaasariaqarpoq ajornartorsiummik oqaloqatiginnilluni qaangiisinnaasoq.

- Nakuuserneq atugaavallaaqaaq – kisitsisitigut saqqummiussiffigineqarpugut persuttaattoqarpallaartoq, arnammi 50 procentiisa inuunermi ilaani persuttaanneq misigisimavaat. Angullu nakuusertartoq aperineqartariaqarpoq sooq nakuusertarnesoq. Aammali innuttaasut tamarmik atuarfiillu peqataasariaqarput allatut eqqarsartaaseqalernissamut aqqutissiuussillutik.

- Oqaloqatigiilluta aporaannerit qaangertariaqarpavut, inooriaaserilertariaqarparput oqaloqatigiilluta qaangiiniarsinnaaneq. Aamma paasiniartariaqarparput suna erloqissutaanersoq taamatut nakuusertarmik kinguneqartitsisoq, sooq-una taamak amerlatigisut nakuusertartut. Tassa eqqartuilluta angusaqartariaqarpugut.

Ilulissani qimarnguik Naneruaq ukioq manna 88-nit orninneqarsimavoq. Inooriaatsillu kinguaarinnut ingerlaqqittarnera ersilersimavoq.

-Qimarngusartut angajoqqaat kinguaavi inersimasunngulersut imaluunniit inuusuttuaqqat meeqqiujaarsimasut maluginiarniarparput aamma taakku qimarnguimmut atuisunngoriartortuaarput, una erseriartortoq malugisinnaavara kinguaariinnut ingerlateqqinneqariartortoq qimarngusarneq, imaluunniit persuttagaasarneq arnat qimaasarnerat naak ukiukikkaluarlutik takussaasoqartarpoq, Martha Petersen oqarpoq.

Anaanap ataatallu persuttaanerat meeqqap persuttarneqarnerattulli sunniuttartoq ilisimaneqareerpoq. Taamaammat inuiaqatigiinni nakuusertarnerup ajoqutai arlaqareerput aamma sulinermut atatillugu, Maliina Abelsen oqarpoq.

Qimarnguimmik Naneruamik atuisut ikiartuinnaraluartut Martha Petersen isumaqarpoq, angutit amerlavallaarujussuartut nakuusertartut. Angutit kalaallit misigissutsiminnik ajornartorsiumminnillu eqqartuinissaq ilikkartariaqaraat aamma oqaatigaa.

Maliina Abelsenillumi qularutiginngilaa oqaloqatigiinnerusariaqartugut.

- Oqaloqatigiinneq periusiuvoq pitsaasoq eqqortorlu, taamaammat atuarfeqarfinni meeqqat inuusuttullu akornganni paasitinneqartariaqarpoq nakuuserneq atugassaanngitsoq, tamannalu siusinnerpaamik paasitinneqartariaqarpoq, Maliina Abelsen oqarpoq.