Arnat 15-it.

Arnat nunatta peqqinnissaqarfimmut akisussaalerneranit tassa 1992-imi januaarimit pinngitsaaliissummik naartunaveersaaserneqarsimasut, Nakorsaaneqarfiup allattorsimaffiani allassimasut taama amerlatigipput.

Arnallu taakku 15-it taarsiiffigineqarlutillu utoqqatserfigineqassasut, naalakkersuisut isumaqarput. Arnaq Knudsen-Frederiksen arnat ilagaat. Imaluunniit eqqornerusumik: Arnaq Knudsen-Frederiksenip arnanut 15-inut taakkununnga ilaanissani neriuutigaa. Taassumami imminut tunngatillugu suliaq Nakorsaaneqarfiup tigusimaneraa akissutissarsinngisaannarpaa.

- Nakorsaaneqarfimmit tusagaqarnikuunngisaannarpunga, Arnaq Knudsen-Frederiksen oqarpoq.

- Suliaq uannut tunngasoq tunniunnikuuara. Akissuteqarfigineqanngisaannarpoq. Taamaammat akissuteqarfigineqartannginnera maalaarutigaara, taannali aamma akineqanngilaq. Maanna ukioq ataaseq qaangiuppoq.

Taassuma Nuummi inaanni isersimaqqippugut. Arnaq Knudsen-Frederiksenimmi oqaluttuassartani KNR-imut oqaluttuarinikuuaa. Taanna 15-inik ukioqarluni najugaqarfigisimasamini, Paamiuni napparsimmavimmi naartuersippoq.

Taanna naartuersinnermi kingorna naartunaveersaaserneqassanersoq nakorsamut oqaloqatigiissutigineqanngisaannartoq taassuma oqaatigaa.

Taanna naartuersinnermi kingunitsianngua anniarujussualerpoq. Arlaleriarluni misissortikkiartorluni nakorsiarpoq, kisianni Pamolinik nipaallisaatinilluunniit allanik tunineqarluni angerlartiinnarneqartuaannarpoq.

Aatsaallu 2002-mi spiraleqartoq paasineqarpoq. Spirali peerneqarpoq, Arnaq Knudsen-Frederiksenili tamatuma kingornali nammineerluni meerartaarsinnaasimanngilaq.

Kamassimallunilu pakatsisoq

Taanna taamanili quleriarluni kingunerluuteqarnini pissutigalugu psykoterapeutimiissimavoq. Taassumalu tamanna nalaateqqikkusunngilaa.

- Iperarniarsaraara, taanna oqarpoq.

Taassuma nikalluussinini takutillugu assani silaannarmut ajallugit tuini annikitsumik qullalaarpai.

Misigissutsit misigisimasatit maanna qaffappat? Kamaammerpit?

- Aap, ilukkut kamassimavunga. Eqqarsarpunga: Suliagut pillugit suliaqartoqarpa? Nalunaarutiginnittoqarsinnaava?

Pakatsisimanera isaanut immatsitsingajappoq.

Nakorsaaneqarfiup qanoq iliornissaa kissaatigigaluarpiuk?

- Sianerfigisinnaavaannga oqarlutillu suliaq suliaralugu, suliaq uannut tunngasoq arnat 15-it akornanniinnersoq, imaluunniit taakku akornanniinnginnersoq oqaatigisinnaavaat.

Ilinnut sianerlutik nalunaarnissaat ilinnut qanoq isumaqassava?

- Inuunermi alloriarlunga misigisimassagaluarpunga. Ingerlaqqissinnaassagaluarpunga.

Maannakkut uninngaannarlutit misigisimavit?

- Aap.

KNR-ip Nakorsaaneqarfik maanna sapaatip akunnerani akissuteqartinniarsarigaluarpaa. Arnat suliamik imminnut tunngasumik Nakorsaaneqarfimmut nassiussisimasut suliap allattorsimaffimmut ilaaneranik sooq paasitinneqarsinnaannginnerat paaserusukkaluarparput. Akissutissarsinissarli periarfissaanngilaq.

Akaarinninnginnerunngitsoq

Spiralilersuisoqarsimaneranut suliamut atatillugu naalakkersuisunit oqaaseqartartoq Naaja Nathanielsen (IA) oqaaseqarniarneruvoq.

Taassuma arnanut Nakorsaaneqarfimmut saaffiginnissimasunut pissutsit alianarnerat paasisinnaallugu KNR-imut erseqqissaatigaa.

Akerliussutsimik takutitsisut 50-it tungaannoortut Arnat nunarsuarmi tamarmi ulluanni marsip arfineq-pingajuanni Nuummi aqqusinermi ingerlaaqatigiipput. Assi © : KNR / Johasinnguaq Olsen

Naalakkersuisullu akissuteqarniarlutik sapinngisartik tamaat suliaqarput. Sapinngisamik piaartumik:

- Uterfiginnissimannginnerput akaarinninnginnerunngilaq. Suliamik suli misissuinerput pissutaavoq, taanna oqarpoq.

- Arnat 15-it taakkununnga ilaanersut oqaluttuussinnaanatigit aalajangersimasumik amerlassuseqartut nalunaarutigigutsigut uggornartorujussuussaaq. Taamaammat ilisimasagut suli naammanngillat. Suliamik suli misissuivugut, taanna oqarpoq.