Arnaq piniartoq nersornaaserneqartoq

Toku Oshima 100.000 koruuninik nersornaaserneqarmat innuttaasunut kaffillertoqarpoq. Tassani Kalaallit Nunaanni Brugsenip siulittaasua oqalugiarpoq.  

Inuk immikkuullarissoq, maligassiuisoq, uummatigissoq inuiaqatigiinnilu immikkuullarissumik iliuuseqartoq nersorniarlutigu Brugseni Qaanaamut aallartitaqarpoq.

AAMMA ATUARUK Årets Pris på 100.000 kroner

- Kalaallit nunatsinni inuppassuarpoq nukittuunik immikkuullarissumillu iliuuseqartuusunik. Inuit namminneerlutik akisussaaffimmik tigusisimasut inuiaqatigiinnilu ajunngitsunik sunneeqataasut, Ib Lennert Olsen oqalugiarnermini oqarpoq.

Nersornaaserneqartoq, Toku Oshima, piniartutut inuussutissarsiuteqarpoq, taassumallu saniatigut meeqqat inuusuttullu angerlarsimaffimmini tikilluaqqusarpai. 

Oshimap angerlarsimaffiani kissalaarneq misigineqarsinnaavoq meeqqallu allat peqatigineqarsinnaallutik. Assassortoqarsinnaavoq ataqqaqatigiinnerlu ilinniarneqartarluni. 

- Oshima immikkuullarissuuvoq taassumallu kulturerput ileqqugullu meeqqanut inuusuttunullu ingerlateqqittarpai. Meeqqat aliasuuteqarpata aamma oqaloqatigisarpai, Ib Lennert Olsen ilaatigut oqarpoq. 

AAMMA ATUARUK Årets Pris til klovnen Miki

Ataatsimoorfiusoq

Toku Oshima meeqqat inuusuttullu illoqarfimmi angalaaginnarlutik aserorterisartut nuannarisarsimanngilai, taamaattumik iliuuseqarniarluni aalajangersimavoq. 
Aamma Qaanaami inuusuttut akornanni imminortarneq iliuuseqarfigerusussimavaa.

Ukiut sisamassaat angerlarsimaffini meeqqanut inuusuttunullu ammatippaa. Ataasinngornikkut, pingasunngornikkut, tallimanngornikkut weekendimilu angerlarsimaffimmini mersortitsisarpoq allanillu aamma sammisassaqartitsisarluni. 

Atortussat Toku Oshimap nammineq isumagisarpai meeqqallu angerlarsimaffimminiitittarlugit. Aamma ikioqatigiittarnissaq, ataqqeqatigiittarnissaq suleqatigiittarnissarlu meeqqanut ilinniutigisarpaa. Meeqqat aliasukkaangata aamma oqaloqatigisarpai.
 
- Oshima meeqqat peqatigalugit utoqqaat illuanni najugaqartunut tupaallattitsimapput. Aaqqasiorsimapput, isersimmasiorlutik alersiliorlutillu utoqqaat pissaannik. Pisoq iluatsilluarsimavoq meeqqallu iliuuserisimasartik assut ilikkagaqarfigisimagaat, Brugsinimit oqaatigineqarpoq. 

- Toku Oshima arnaavoq immikkuullarissoq nersortarialik.