Arnaq ikuallatsitsisutut eqqartuunneqartoq
Ikuallanneq Qinngorpumi inissiat majuartarfiini inissiamilu decembarip 29-ani ullup qeqqata tungaani pivoq. Majuartarfiit taakkuusut killinganni nujaqartut inissiamiit qimagutitinneqarput.
Ikuallattoqarneranut atatillugu inuit marluk napparsimmavimmi nakkutigineqartussanngorlugit unitsinneqarput. Ikuallattoqarnerata kinguninngua inissiami ikuallaleqqaarfiusumi arnaq najugaqartoq tigummigallarneqartussanngorlunilu ikuallatsitsisutut pasineqartut politiit oqaatigaat.
Sermitsiaq.AG-p februaarip 27-ani allaaseraa unnerluussissut naapertorlugu arnaq arnamut allamut videokkut sianersimasoq. Oqaloqatigiinnerminni arnap pasineqartup qipik innermik ikissimallugu oqaloqatigisaminut oqaluttuarisimaa. Arnaq sianerfigineqartoq naapertorlugu oqaluunnerminni inneq tunuani takuneqarsinnaasimavoq.
Arnaq sapaatip akunnerata siuliani Sermersuup Eqqartuussiviani sassartinneqarpoq. Eqqartuussiviullu eqqartuussut pingasunngornermi aalajangiiffigaa: Ukiumi ataatsimi pinerluuteqarsimasunut inissiisarfimmiittussanngorlugu, tamanna unnerluussisussaatitaasut piumasaqaatigaat.
Illersuisup unnerluussisussaatitaasullu tamarmik eqqartuussut tiguaat, aalajangiinerlu naammassineqarluni.
