Arnaq hashimik anngiortumik eqqussisutut pasineqarluni tigummigallarneqartoq
Arnaq 30-nik ukiulik hashimik anngiortumik eqqussisimasutut pasineqarluni ulluni 28-ni tigummigallagassanngortinneqarpoq.
Kalaallit Nunaanni Politiinit politikommissæri, Malik Sandgreen KNR-imut paasissutissiivoq.
Arnaq timimini 1 kiilumik hashimik toqqorsimasoqarluni Kangerlussuarmi ataasinngornermi tigusarineqarpoq.
Taanna Eqqartuussisoqarfik Sermersuumi Nuummi ippassaq sassartinneqarpoq, eqqartuussisullu taanna ulluni 28-ni tigummigallarneqartussanngortippaa. Pasineqartumik tigummigallaanissamut ullunik 28-nik aalajangiineq eqqartuussisup aalajangersinnaasaanik qaffasinnerpaavoq.
AAMMA ATUARUK Hashi 12 millionit koruuninik nalilik RAL-ip umiarsuaani nassaarineqartoq
- Taanna hashimik 1 kiilumik anngiortumik eqqussisutut pasineqarpoq, Malik Sandgreen oqarpoq.
- Politiit suliamik matoqqasumik suliarineqartumik maanna misissueqqissaartussanngorput. Tamannalu pissutigalugu annerusumik oqaaseqarsinnaanngilagut.
Hashi arsaarinnissutaasoq 2021-mi annertunerulersoq
Hashi 97,4 kiilu 2021-mi arsaarinnissutigineqarpoq. Taakku ukiunut tallimanut sanilliullugu agguaqatigiissinneranit tassa agguaqatigiissillugu hashimit 64 kiilumit annerungaatsiarpoq.
Politiit 2021-mi ukiumoortumik naatsorsueqqissaarnerata takutippaa.
Siorna – tassa 2022-mi – ikiaroornartumik nunatsinnut anngiortumik eqqusseriaraluarlutik tigusarineqartut pingasoriaammik amerlanerupput. Amerlanerpaallu hashimik anngiortumik eqqusseriartuullutik.
Siorna oktobarip 20-ani ikiaroornartumik iioraasimasumik toqusoqaqqippoq. Angut Qaqortumeersuuvoq, taassumalu hashi poortorneqarsimasoq iiorarsimasaa erlaviini katersuussimasoq toqqutigaa.
Taanna ikiaroornartumik iioraasimasut ukiup affaata ingerlanerinnaani toqusut pingajoraat.