Arnaq 26-nik ukiulik inuarneq peqqarniitsumillu nakuuserneq pissutigalugit Danmarkimi inissinneqartussanngortinneqartoq

Arnap maanna 26-nik ukioqartup ilisarisimasani 55-inik ukiulik Sisimiuni siorna februaarimi sisamariarlugu kapivaa anaananilu kilertillugu.

Savimmik kapisinerit 55-inik ukiullip akunnialuit qaangiunneranni toquneranik kinguneqarput, kapisinerimmi ilaanit arnap qungasiani taqaq tillertoq eqqorneqarsimammat tamanna aaverussutigaa.

26-nik ukiulik kingusinnerusukkut unnukkut tigusarineqarpoq, aqaguanilu Eqqartuussisoqarfik Qeqqanit ulluni 28-ni tigummigallagassanngortinneqarpoq.

Eqqartuussisoqarfik Qeqqatap arnaq Danmarkimi tarnikkut annertuumik nappaateqartunut inissiisarfimmiittussanngortillugu maanna eqqartuuppaa.

Suliami unnerluussisoq, Cecilie Stürup Sørensen eqqartuussuteqartoqarnerata kingunitsianngua taama oqarpoq.

Eqqartuussuteqartoqannginneranili pisuutinneqartoq

Arnaq 55-inik ukiulimmut toqutsisimasutut anaanaminullu peqqarniitsumik nakuusersisimasutut sapaatip akunnerani siusinnerusukkut pisuutinneqarpoq.

Taassumali tarnikkut qanoq innera pissutigalugu pineqaatissiissutissap aalajangerneqarnissaa ullumikkumut utaqqissunneqarpoq.

- Suliami matumani eqqartuunneqartup tarnikkut peqqissusaa pissutigalugu qanoq eqqortumik immikkut pineqaatissiisoqarnissaa qularutigineqarsimavoq, eqqartuussiveqarfiulli arnaq nalinginnaasumik inissiisarfimmiinnissaminut naleqqutinngimmat Danmarkimi inissinneqartussanngortinneqarpoq, taanna oqarpoq.

Unnerluussisussaatitaasup eqqartuussut 'ilorrisimaarutigaa', taamalu eqqartuussuteqartoqarnissaaa aamma piumasarisimallugu oqaatigaa.

- Eqqartuussiveqarfiup unnerluussisussaatitaasut isumaqatigai, inuimmi tarnikkut annertuumik innarluuteqartut pineqartillugit toqutsineq pillugu suliaqarnermi nalinginnaasutulli pineqaatissinneqarsimasunut inissiisarfimmiittussanngortitsineq ajorpugut.

- Eqqartuussiviup eqqartuunneqartoq nakorsat aalajangiinerat aallaavigalugu pisariaqartitaminik aalajangersimasunik sinaakkutaqartinneqarnissaa paarineqarnissaalu eqqornerpaasoq aalajangerpaa. Aammali inuiaqatigiittut arnap pinerluuteqaqqinnginnissaanik pinaveersaartitsinerussalluni, Cecilie Stürup Sørensen oqarpoq.

Piffissaligaanngitsumik eqqartuunneqartoq

Inissiinissamik eqqartuussuteqartoqarnera pissutigalugu eqqartuussutigineqartoq piffissaligaanngilaq.

- Taama pineqaatissinneqarluni eqqartuunneqarsimagaanni aamma ilungersunarluinnartumik toqutsinermi pisuutinneqarsimagaanni piffissami sivisunerpaaffiliisoqartannginnera nalinginnaalluinnarpoq, Cecilie Stürup Sørensen nassuiaavoq.

Taamaammat eqqartuussut ukiut pingasut qaangiuppata aatsaat siullermeertumik misiliutigineqaqqissinnaavoq, tamatumalu kingorna ukiut aappaata tamaasa. Eqqartuussut allanngortinneqassappat unnerluussisussaatitaasut eqqartuussivikkoorteqqeqqaassavaa.

Eqqartuunneqartoq siusinnerusukkut oqaatigineqartutulli Danmarkimi inissinneqassaaq. Isumaginninnermut aqutsisoqarfiup 26-nik ukiulimmut naleqquttumik piffissami matumani maani inissiiffissaqanngitsoq nalilerpaa.

Illersuisup unnerluussisussaatitaasullu eqqarsarfissaqarnissamut atatillugu piffissaqarumapput.