Arnánguak Schmidt Ivaaqqamiittuutilik: Ilaqutariittut toqqammavigut sekundimut sequmipput
- Uagut ilaqutariittut aallaavigissagutta, ukiorpassuarni ilaqutariittut toqqammavittut, napassutitut ilutsinni sanarfinikuusagut. Inuttut namminneq suliarinikuusagut tamavimmik sekundimut sequminnikuupput, Ivaaqqami najugalimmik panilik, Arnánguak Schmidt oqarpoq.
Arnánguak Schmidtip pania 25-nik ukiulik, arfinilinnik ukioqarlunili Ivaaqqami najugaqalerpoq.
Taanna pisussinnaanngilaq, oqalussinnaanngilaq, nangeqartarpoq nammineersinnaanani.
Suliaq naatsumik
23-nik ukiulik, annertuumik innarluuteqartoq septembarip aappaani ernertaavoq, taassuma naartunera kimilluunniit ilisimaneqanngilaq.
Arnaq oqalussinnaanngilaq, paarnguinnarsinnaallunilu nangeqartuuvoq.
Qaqortumi Politiit Ivaaqqami kinguaassiutitigut atornerluisoqarsimanera pillugu nalunaarfigineqarsimallutik erngertumik uppernarsarpaat.
Angut 62-inik ukiulik atornerluisimasutut pasineqarluni novembarip aallaqqaataani tigusarineqarpoq. Taanna ulluni 22-nik tigummigallagassanngortinneqarpoq.
Meeqqanut, inuusuttunut, ilaqutariinnut peqqissutsimullu naalakkersuisup, Mimi Karlsenip (IA) nuna tamakkerlugu ulloq unnuarlu paaqqinniffimmi pissutsinik misissuisoqarnissaa aallartippaa. Paaqqinniffimmi inatsisit malinneqarnersut misissorneqassapput.
Tiliup aamma Inuit pisinnaatitaaffii pillugit Siunnersuisoqatigiit suliamut atatillugu isornartorsiuingaatsiarput, Inuit Pisinnaatitaaffii pillugit Siunnersuisoqatigiit unioqqutitsineq inuit pisinnaatitaaffiinik unioqqutitsinerunerarpaa.
Isumaginninnermut aqutsisoqarfik suliap saqqummerneranit ullualuit qaangiuttut Qaqortumukarluni sulisut Ivaaqqamilu aqutsisut peqatigalugit suliamik misissuivoq.
Ivaaqqami najugalik septembarimi meerartaariasaarnerata kingunerisaanik maanna Ivaaqqami najugaqartuutillit angajoqqaat qisuariaateqarput, piumasaqaatinillu arfineq marlunnik apuussillutik.
Taamaammallu Ivaaqqami najugaqartut ilaat atornerlunneqarluni meerartaarnera angajoqqaaqataasumut misigissutsitsigut aalassatsitseqqaqaaq.
Pisumut politiit misissuinerminni angut 62-inik ukiulik atornerluisimasutut pasillugu tigusaraat.
AAMMA ATUARUK Angut 62-inik annertuumik innarluutilimmik atornerluisimasutut tigusarineqartoq
Pisup kingorna taassuma pania quumigut misissorneqarpoq naartunersoq, taamatullu misissuineq anaanaasup toqqissisimanarinngilaa.
- Nakorsap paniga ,misissoramiuk ima oqarfigaanga; qanittumi kinguaassiutitigut atornerlunneqarsimanngippat taava takuneqarsinnaanngilaq atornerlunneqarnikuusimanersoq.
- Aalassaqqanarpoq soorlu suli misigissutsikkut ikeqqajaanartarpoq, aalassaqqajaanartarpoq misikkarippugut suli, illersuerusussuseq sakkortuumik suli takkuttarpoq, Arnánguak Schmidt oqarpoq.
Sinittarfimmut isernermi aninermilu nalunaarsortarneq
Inatsisit malillugit nakkutilliissutinik filmiliuutinik sinittarfinnut ikkusseriaannaasoqanngilaq.
Taamaammallu Arnánguak Schmidt angajoqqaaqatini allat peqatigalugit allatut siunnersuuteqarput,
- Ivaaqqami najugallit inaannut sulisoq iserniaraangat atortorissaarut soorlu chip atorlugu nalunaartassaaq iserluni, anilerneranilu aamma nalunaartassalluni. Taava qanoq sivisutigisumik isersimanersoq nalunaarsorneqartarluni. Kiisalu sulisut arnat arnanut sullissisassapput, angutillu angutinut sullisisassallutik.
Taassuma pania 2004-mili Ivaaqqami najugaqalerpoq.
Taamanerniilli angajoqqaasut ataaseriaannarlutilluunniit nakkutilliisunit (tilsynimit) aperineqarnikuunngillat qanoq innersut.
- Inatsimmi aamma allaqqagami misissuisoqartassasoq, taakku nakkutiginninnerat apeqqusernartorujussuuvoq, qanoq innarluutilinnut aamma ilisimasaqartiginerat. Inatsimmiittut tassani misissuisussaatitaaneq eqqarsaatigalugu najugaqartut, soorlu panipput aallaavigigukku piginnaatitaaffiiagaavoq uagut angajoqqaat panipput sinnerlugu oqartussaassuseqarpugut.
- Taamaattumik ukiut amerlasuunik najugaqarnerani ataasinnguamilluunniit attaveqarfigineqarnikuunngilagut aperineqarluta panissi qanorippa? Imaluunniit qanorissoraasiuk?
AAMMA ATUARUK Angajoqqaat Ivaaqqamiittuutillit: Meeqqagut naammattumik misissorneqarnersut naluarput
Angajoqqaat piumasaqaatinik arfineq marlunnik tunniussaqarput. Taakku saniatigut naalakkersuisumut, Mimi Karlsenimut aamma isornartorsiuipput.
- Mimi Karlsenip piumasaqaatiginikuusai eqqarsaatigalugit soorlu nangilersuinermi inuit marluusassasut, Arnánguak Schmidt oqarpoq.
- Kisianni tamanna piviusunngortikkuminaappoq, pissutigalugu Ivaaqqami ullukkut unnuakkullu sulisartut pingasuusarput, taava innarluutillit arfineq marluk uninngallutik. Sulisuni taakkunani marluk nangilersueqatigiinniarunik taava sulisup pingajuat kisimiileriissaaq.
Taamaammat Ivaaqqami sulisut amerlineqarnissaat angajoqqaanit kissaatigineqarpoq.
KNR Ivaaqqamit oqaaseqartitsiniarsarigaluarpoq, tamannali iluatsinngilaq. Ulloq unnuarlu angerlarsimaffiup Isumaginninnermik aqutsisoqarfik innersuussutigaa. Tamanna Isumaginninnermik aqutsisoqarfiup pisortaanut, Helene Berthelsenimut isornartorsiuineq akissuteqartinnissaa sulissutigaarput.
