Canadap issittortaa nunarsuarmi maanna issinnerpaasoq
Nunarsuarmi sumiiffiit ulluni makkunani issinnerpaat 15-it akornanni qulit Canadap issittortaani nassaassaasut, Alaskamilu ataaseq, CBC Newsip allaaseraa.
Yukon Territorymi nunaqarfimmi Carmacksimi sapaatip-akunnerata siuliani 49,8 gradinik issippoq, Nunavuullu avannaarsuani Qaasuitsumi 46-nik issilluni.
Nunaqarfinni arlalinni anoraa ilanngullugu 55-inik 60-illuunniit akornanni issinneratut misigisimanarpoq.
Siberiami Jakutskimi issinnerujussua eqqaassanngikkaanni, Canadap issittortaani Alaskamilu nunarsuarmi sumiiffiit akornanni issinnerpaasoq, nittartakkami WXNow-imi allaaserineqarpoq.
Canadap Atlantikup tungaanut sineriammi Newfoundlandimi sukannersumik aqutsisoqarnissaanut peqqussut suli atuuppoq. Tamaani sapaatip-akunnerata naanerani 1 meterimik ilaatigut apivoq, anorlingaatsiarlunilu perlulluni.
Sakkutuut 300-t aputaajaanermut ikiuuttussat, Canadap naalakkersuisuinit Newfoundlandiliartinneqarput, tamaani innuttaasut napparsimmaviliarsinnaanissaat, pisiniarfinnukarsinnaanissaallu qulakkeerniarneqarluni.
Silassamillu ilimasaarutit qimerlualaaraanni pissutsit ulluni tulliuttuni pitsassiartorpallaarunanngillat. Canadammi issittortaani Canadamilu sumiiffinni allani anorlingaatsiarlunilu issingaatsiarnissaa ilimasaarutigineqarpoq.