Arfiviit pillugit Demokraatit paasitinneqarusupput
Arferit pineqartut tassaapput arfiviit marluk Qeqertarsuup Tunuani apriilimi pisarineqartut. Atuagagdliutit paasisai naapertorlugit arfiviup pisarineqartup aappaata neqaata affarsua asuliinnartinneqarsimavoq, arferit pilannerat pilattussanik amigaateqarneq pillugu arriisaarunneqarsimammat.
Piniarnermut Naalakkersuisoqarfiup pisortaa Amalie Jessen AG-mut oqarpoq, arfiviit qassi procentiat asuliinnartinneqarsimanersoq ilisimagini, oqaatigiumanaguli.
- Kisitsisit qanoq annertutiginersut ilisimavara, nalunaarutiginissaalli kissaatiginagu. Kanngunartuliorneq pillugu AG taamaallaat allaaserisaqarniarmat nalunaarutiginianngilakka, AG-mut oqarpoq.
Taama oqarnera Niels Thomsenip akuerisinnaanngilaa.
- Neqerujussuup iluaqutissap asiutiinnarneqarsimaneranik tusagaq ilumoorsimappat pisoq akuersaarsinnaanngilarput. Demokraatinit aarleqqutigaarput, tusakkap nunarsuup sinneranut kinguneqarnerluttumik siaruaassinnaannera. Taamaammat pingaaruteqarpoq paasissallugu, neqi qanoq angitigisoq atorluarneqanngitsoornersoq. Qanorlu nunatsinniit iliuuseqarfigissaneripput, Niels Thomsen oqarpoq.
Niels Thomsenip § 36-imik taasamik Naalakkersuisumut Ane Hansenimut apeqquteqaatigaa, arfiviit pisarineqartut procentinngorlugu qanoq atorluarneqartigisimanersut akineqassasoq.
KNR-imit Naalakkersuisoqarfimmut paasisaqarnerorusulluta saaffiginnikkaluaratta aamma akiumaneqanngilagut, arfivinniaqataasimasunut suleqatigiinnertik innarlerneqaqqunagu apeqqutit akiniarnagit aalajangersimallutik tunngavilersuutigaat.
Suliamut tunngasumik pisortat paasissutissaataannik tamakkiisumik allakkatigut paasissutissinneqarnissamik qinnuteqaammik KNR-imit nassiussaqareerpugut.
