Arfininngornermi Nuummi peqatigiiffiit ulloqartinneqassapput
Peqatigiiffiit suulluunniit arfininngorpat Nuummi illorsuarmi timersortarfimmi siumugassaajumaarput. Tassaapput timersoqatigiiffiit, utoqqaat peqatigiiffiat sanaluttartullu Nuummi peqatigiiffippassuit ilamininngui taassagaanni.
- Aaqqissuussaq manna atorlugu illoqarfitsinni peqatigiiffiit saqqumilaarnissamut periarfissippagut aammalu aaqqissuussat assigiinngitsut arlallit illumi ataatsimi takusarnissaannut innuttaasut periarfissillugit. Aaqqissuusseqatigiinnikkut peqatigiiffiit periarfissaqassapput misilittakkaminnik isumassarsiaminnillu paarlaasseqatigiinnissamut, Kommuneqarfik Sermersuumi peqatigiiffilerinermut siunnersorti Mansi Mikael Rasmussen KNR.gl-mut oqarpoq.
Ulloq taanna pingaarnertut pisussaq tassaavoq Kommuneqarfik Sermersuumi Peqatigiiffitsialammik toqqaanissaq. Peqatigiiffiit nersornaasigassatut piukkussaminnik toqqaassapput. Toqqaanissarlu kommunimi atorfillit inaarutaasumik isummerfigissavaat.
- Piukkunnartunik saqqummiussisut ukiormanna amerlagisassaanngillat peqatigiiffiit imminnut ilisimanerat killeqarmat. Aamma peqatigiiffiup qanoq saqqumilaartigisimaneranut tamanna ersiutaasinnaavoq. Nalilersuereerutta qulakkeerniassavarput peqatigiiffiit tamarmik siulittaasoqarlutillu siulersuisoqarnissaat. Kajumittunik pissarsiniarneq ajornakusoortarmat kommunimiit arlaatigut iliuuseqartariaqarpugut, Mansi Mikael Rasmussen oqarpoq.