Arfernut angisuunut pisassiissutit allanngorput
Biologit siunnersuuteqarnerat nutaaq malillugu Kitaani tikaagullittassat 200-iniit 178-inut ikilineqarput, pisarineqanngitsoortulli 15-init ukiumut tullermut nuunneqarnissaannut periarfissiisoqarluni.
- Tamanna ukiumut pisaasartunut sunniuteqassangatinneqanngilaq, ukiumummi pisaasartut ukiuni kingullerni pisassiissutip nutaap amerlassuserititaatut amerlatigisarsimammata. Arfanniarsinnaaneq maannamut ingerlareertigisoq 30-it sinnilaaginnarlugit pisarineqarsimapput, taamaattumik aggustip naalernerani agguaasseqqinnissap tungaanut pisassiissutaareersimasut allannguuteqanngikkallassapput, taama Aalisarnermut Naalakkersuisoqarfik tusagassiuutitigut nalunaarummi ilisimatitsivoq.
Tunumut pisassiissut tikaagulliit 12-it allannguuteqarfigineqanngillat, periarfissaqarporlu pisarineqanngitsoortut ilaasa pingasut ukiumut tullermut nuunneqarsinnaanerat.
Tikaagulliusaat ukiumut pisassiissutit 19-iugaluartut 10-nut ikilineqarput qipoqqartassinneqarnissamut isumaqatigiinniarnermut atatillugu.
- Ukiuni kingullerni sisamani tikaagulliusaartarineqartarsimasut pisassiissutitut nutaatut amerlatigiinnangajattarput, taamaattumik pisassiissutit ikilinerat kalaallit tikaagulliusaarniarnerannut annertunerusumik sunniuteqassanngilaq, Aalisarnermut piniarnermullu Naalakkersuisoqarfik ilisimatitsivoq.
Kalaallit Nunaat 1986-ip kingornagut siullerpaamik qipoqqartassinneqarpoq. Ukiumut pisasssiissutigineqarput qipoqqaat qulingiluat, pisarineqanngitsoortut marluk ukiumut tullermut nuunneqarnissaannut periarfissalerlugu.
Pisassiissutip taassuma sinerissamut agguaanneqarnissaa KANUKOKA, KNAPK aammalu Aalisarnermut, Piniarnermut Nunalerinermullu Pisortaqarfimmit suleqatigiiffigalugu ingerlanneqassaaq.
Pisortaqarfiup ilanngullugu ilimatitsissutigaa qipoqqarniarneq aallartitsinnagu arfernik angisuunik illersuineq piniarnerlu pillugu nalunaarutip allanngortinneqarnissaa pisariaqarpoq. Naatsorsuutigineqarpoq tamakkuninnga piniarneq septemberip aallartinnerani aallartinneqarsinnaassasoq.
Arfiviit ukiumut pisassiissutit allanngoratik marlupput, pisarineqanngitsut marluk ukiumut nuunneqarnissaannik periarfissaqarluni.
