Arfattassat amerlanerusut itigartitsissutigineqarput

Kalaallit Nunaannit arferit nungukkiartunngitsut ulorianartorsiortsinneqanngitsullu biologinit misissorneqarsimagaluartoq, Kalaallillu inuisa arferit mattaanik neqaanillu nerisaqarlutik iluaquteqaraluartut taammaattoq Kalaallit arfittassanik amerlanerusunik arfanniarsinnaanissamik kissaateqarnerat itigartsinneqarpoq. Nunat EU-mi ilaasortat amerlasuut taaseqataanermi itigartitsisuni amerlanerussuteqartunut ilaapput.

-Atorluuaaneq pillugu ilisimasat isiginiarneqanngillat, aallartitammi arlallit IWC-p inatsissaani politikkikkut tunngavillit kisiisa isiginiarpaat. Uumasunit nerisaqarsinnaaneq inuiannut pisussaaffiuvoq, uanilu taama aaliangiisoqarnerani IWC-mi aqutsineq akuerineqarsinnaanngitsoq pilersinneqaannarpoq, IWMC-mi siulittaasoq taasinerup kingorna iluarisimaarinninngeqisoq Eugene Lapointe taama oqarpoq.

Nunat peqataasut arlallit isumaqarput Kallallit Nunaat amerlanerusunik arfattassinneqassanngitsoq. Tamatumani arferit neqaannik neuruteqartoqarnera tunngavigineqarluni. Tamatumanilu ilaatigut tunngavilersuutigeqarpoq arferit neqaasa neriniartarfinni takornarianut sassaalliutigineqartarnerat. Inuiaqatigiinnili arferit neqaannik nerisaqarluarneq tusarsimagunanngivippaat.

-Inuiaqatigiit pinngitsaalineqarsinnaanngillat nerisat suut nerissaneraat. Inuiaallumi nerisaat qanganiilli ileqqoralugu kulturikkut pigeriigaat allanngortsinneqarsinnaanngillat. IWC-lu tassaanngilaq inuit sunik nerisaqassanerinik qanorlu annertutigisumik nerisaqarnissaannik aaliangiisussaq, IWMC-mi siulittaasoq Eugene lapointe naggasiivoq.