Arctic Winter Games-mi kalaallit qitissapput
Isiginnaagassiaq sungiusarneqaleruttortoq ”My Home is the Home of Peace” – Eqqissinerup Angerlarsimaffia, Nunani Avannarlerni Piorsarsimassutsikkut Attaveqaatip NAPAp isiginnaagassiarititaraa, Ruth Montgomery-Andersenimit isumassarsiarineqarlunilu ilitsersorneqartoq.
”My Home is the Home of Peace” isumassarsiaavoq Abbas Fendip Iranimiup taalliaa aallaavigalugu.
”Eqqissinerup Angerlarsimaffia”-ni inuusuttut arfinillit isiginnaartitsisuussapput. Tassani nipilersuut Intalik Milnemit suliarineqarsimasoq, qitinnermilu Randi Broberg aamma Alexander Montgomery-Andersen sungiusaasuupput. Oqaatsit atuakkamit ”Sjæl gør dig smuk”-imit Inuit anersaamut paasinnittariaasiannut attuumassutillit oqariartaatsit atorneqarput.
Atisalianik kalaallisuunik annoraanillu mersortuuvoq Louise Lynge Hansen, scenelerisuullunilu Siri Langdalen Norgemeersoq.
Isiginnaagassiami pingaarnertut oqariattuutigineqarpoq oqaatsit nukittussusaat kimiallu. Taakkulu issuaanikkut oqariartuutigineqarput.
Qitinnermi ilaatigut amerikarmiut ussersorlutik oqaasii atorneqarput. Tassa eqqissineq, pilluarneq kiisalu asanninneq ussersornikkut oqariaruutigineqarput.
Sungiusaasup aappaata Randi Brobergip oqaatigaa aaqqissuineq unamminartuusoq.
- Inuusuttut ineriartornerat malunnarpoq. Ilaatigut unamminarsinnaavoq, nuanneqaarli qanoq siuariartortigineri takusinnaallugit, Randi Broberg KNR.gl-imut oqarpoq.
Aamma isiginnaartitsisussat ilaata Pauline Kristensenip aatsaat taamatut aaqqissuussinermi peqataasup, Upernaviup eqqaani Nuussuarmeersup nuannersutut oqaatigaa.
- Aatsaat misiliilluni artornalaarpoq, aamma sungiusaqatigiiulluta aatsaat takugatta, aallaqaammut ittuulaarpugut. Kisianni sungiupparput, nuanneqaarlu, Pauline Kristensen KNR.gl-imut oqarpoq.
Issittormiut unammiuaarnerat 2012-mi marsip arfineq pingajuanni qulingilaanilu Canadami Yukonimi illoqarfik Whitehorsemi isiginnaagassiaq takutinneqassaaq.
Isiginnaagassiaq marsip aallaqqaataani Katuami Hans Lyngep inersuaami takuteqqaarneqassaaq. Isissutissanik aallertoqarsinnaalereerpoq. Iserneq akeqanngilaq.
