Arctic Winter Games imaannaanngitsumik annaasaqarpoq
Ataqqinnittumik Mr. Donald Cooper Arctic Winter Gamesimik suliaqartut akornanni eqqartorneqartarpoq. Arctic Winter Gamesip nunani tamalaani komiteani 1986-miit 1994-mut præsidentiunermini sunniuteqangaatsiarpoq nunatsinnut aamma sunniuteqartumik.
- Donald Cooperip siunissamut takorluugai issittumi timersornerup ineriartorneranut assut sunniuteqarsimapput tamannalu ineriartorneq ukiorpassuarni suli malunnaateqartussaavoq, Arctic Winter Gamesip nunani tamalaani komiteani præsidenti Gerry Thick taama nalunaarpoq.
Donald Cooperip præsidentiunerata nalaani Kalaallit Nunaat aamma Ruslandip issittortaaniittut Arctic Winter Gamesimi peqataasinnaasutut akuerineqarput, kalaallillu peqataatitaat siulliit 1992-imi unammiartorput. Donald Cooperip aamma sunniuteqarneratigut illup iluani arsaannerit Arctic Winter Gamesimi unammissutinut ilanngunneqarput aammattaarlu Arctic Sports Dene Gamesilu annertunerusumik unammissutaasalerlutik.
Tassalu timersuutini taakkunanerpiaq ukiuni makkunani kalaallit angusarissaartarput issittormiut ukioq allortarlugu unammiuaartarneranni timersortartut 2.000-it missaanniittut peqataaffigisagaanni. Tassani peqataasarput Rusland, Lapland, Kalaallit Nunaat, Canada aamma Alaska.
